నా వల్లే ‘నాటు నాటు’కు ఆస్కార్-అజయ్

ఇక్కడ టాలీవుడ్ అభిమానులేమో.. ‘నాటు నాటు’ పాటకు ఆస్కార్ దక్కడంలో జూనియర్ ఎన్టీఆర్, రామ్ చరణ్‌లలో ఎవరికి ఎక్కువ క్రెడిట్ దక్కుతుందని కొట్టేసుకుంటూ ఉంటే.. అసలు ఈ పాటతో సంబంధమే లేని అజయ్ దేవగణేమో.. తన వల్లే ఈ పాటకు అకాడమీ పురస్కారం వచ్చిందని స్టేట్మెంట్ ఇవ్వడం విశేషం.

అజయ్ ‘ఆర్ఆర్ఆర్’లో భాగం అయినప్పటికీ.. ‘నాటు నాటు’ పాటకు, ఆయనకు ఏ సంబంధం ఉండదు. అజయ్ పాత్ర వచ్చేది ఫ్లాష్ బ్యాక్‌లో రామ్ చరణ్ పాత్ర చిన్న వాడిగా ఉండగా. ఈ పాటేమో వర్తమానంలో చరణ్ పెద్దవాడయ్యాక వస్తుంది. అయినా తన వల్లే ఈ పాటకు ఆస్కార్ వచ్చిందని వ్యాఖ్యానించాడు అజయ్. కాకపోతే ఆయన ఈ మాట అన్నది సరదాగానేలెండి.

తన స్వీయ దర్శకత్వంలో రూపొందిన ‘భూళా’ ప్రమోషన్లలో భాగంగా అజయ్.. కపిల్ శర్మ కామెడీ షోకు వచ్చాడు. ఈ సందర్భంగా మీరు నటించిన ‘ఆర్ఆర్ఆర్’లోని నాటు నాటు పాటకు ఆస్కార్ వచ్చింది కదా అంటూ అభినందనలు తెలిపాడు కపిల్.

ఇంతలో అజయ్ అందుకుని.. “నా వల్లే నాటు నాటు పాటకు ఆస్కార్ వచ్చింది” అన్నాడు. అందరూ ఆశ్చర్యపోతుండగా.. “ఒకసారి ఊహించుకోండి.. నేను ఆ పాటకు డ్యాన్స్ చేసి ఉంటే పరిస్థితి ఎలా ఉండేదో” అంటూ తన మీద తనే సెటైర్ వేసుకున్నాడు. తాను డ్యాన్స్ చేయకుండా వదిలేశాను కాబట్టి.. తారక్, చరణ్ చేశారు కాబట్టే ఈ పాట అంత పెద్ద హిట్టయి ఆస్కార్ అవార్డు గెలిచే వరకు వెళ్లిందని.. కాబట్టి అవార్డు రావడానికి తనే కారణం అన్నది అజయ్ ఉద్దేశం. ఈ కామెంట్ చూసి అజయ్ సెన్సాఫ్ హ్యూమర్ సూపర్ అని నెటిజన్లు కొనియాడుతున్నారు. ‘భూళా’ ఈ నెల 30న ప్రేక్షకుల ముందుకు రానుంది.