మాస్ ఇమేజ్ కోసమా ఇంత పెద్ద ప్లాను

అప్ కమింగ్ కుర్ర హీరోలకు మాస్ ఇమేజ్ రావాలంటే కొంత టైం పడుతుంది. సరైన దర్శకుడు కాంబో అన్నిటిని మించి కథ పడాలి. అప్పుడే ఫాలోయింగ్ పెరుగుతుంది. పవన్ కళ్యాణ్ సైతం సుస్వాగతం నుంచి ఖుషి దాకా ఎక్కువ లవ్ స్టోరీలే చేశాడు. స్వంత టాలెంట్ ఎంత ఉన్నా మొదట్లో మెగా బ్రాండ్ అండ బాగా ఉపయోగపడింది. నితిన్, రామ్ లాంటి వాళ్ళుకు అంత ఈజీగా జరగలేదు. నాని పాతిక సినిమాలు దాటాకే ఊర మాస్ దసరాతో వస్తున్నాడు. కానీ కిరణ్ అబ్బవరం మాత్రం ఈ లెక్కలకు అతీతంగా వేగంగా మాస్ నిచ్చెన ఎక్కడానికి పరుగులు పెడుతున్నట్టు కనిపిస్తోంది.

ఆ మధ్య నేను మీకు బాగా కావాల్సినవాడినిలో కమర్షియల్ హీరోగా ప్రొజెక్ట్ చేసుకోవడానికి చాలా ట్రై చేశాడు. సబ్జెక్టుతో పాటు టోటల్ కాన్సెప్టే తేడా కొట్టేసింది. వినరో భాగ్యము విష్ణు కథ లాంటి డీసెంట్ స్టోరీలోనూ శ్రీమంతుడు టైప్ ఫైట్లు గట్రా పెట్టేశారు. భారీగా కాదు కానీ ఓ మోస్తరుగా ఆడేసి పాస్ మార్కులు దక్కించుకుంది. ఇప్పుడు మీటర్ తో రాబోతున్నాడు. దీని లిరికల్ సాంగ్ ని రేపు సాయంత్రం తెలుగు రాష్ట్రాల్లో ఏకంగా ఇరవై థియేటర్లలో లాంచ్ చేయబోతున్నారు వాటిలో అధిక శాతం ఆంధ్రప్రదేశ్ వే ఉండటం గమనార్హం. హైదరాబాద్ లేకపోవడం మరో ట్విస్టు.

ఇలా ప్లాన్ చేసుకోవడం ద్వారా తనకు థియేటర్ మాస్ ఫాలోయింగ్ బలంగా ఉందన్న సందేశం జనంలోకి వెళ్తుందన్న ఉద్దేశం కావొచ్చు. మీటర్ లో మైత్రి మూవీ మేకర్స్ నిర్మాణ భాగస్వామి కావడం ఇంత మార్కెటింగ్ కు కారణంగా కనిపిస్తోంది. ఊర మాస్ పోలీస్ ఆఫీసర్ గా కిరణ్ అబ్బవరం తన ఇమేజ్ కి మించిన పెద్ద పాత్రే చేస్తున్నట్టు టీజర్ చూస్తే అర్థమవుతోంది. పాటకే ఇంత పెద్ద స్కేల్ ని ప్లాన్ చేస్తే ట్రైలర్ కి, ప్రీ రిలీజ్ ఈవెంట్ కి ఏం చేస్తారో మరి. ఏప్రిల్ 7 విడుదల కాబోతున్న మీటర్ కు రవితేజ రావణాసురతో పాటు దగ్గబాటి అభిరాం అహింస పోటీలో ఉంది.