సుధీర్ బాబు.. ది పెర్ఫామర్

కృష్ణ అల్లుడిగా, మహేష్ బాబు బావగా ఇండస్ట్రీలోకి అడుగు పెట్టిన సుధీర్ బాబు.. కొన్నేళ్ల పాటు అదే ముద్రతో కొనసాగాడు. మొదట్లో తెరపై అతణ్ని చూడడం చాలా ఇబ్బందిగా ఉండేది. తన హావభావాలు అంతగా ఆకట్టుకునేవి కావు. డైలాగ్ డెలివరీ చాలా పూర్‌గా అనిపించేది. ‘ప్రేమకథా చిత్రమ్’ సూపర్ హిట్టయినా కూడా అతవికి ఏమాత్రం ప్లస్ అవ్వలేదు. తన గురించి ఎవ్వరూ పెద్దగా మాట్లాడుకోలేదు. ఆ తర్వాత వచ్చిన కొన్ని సినిమాలు చూసి సుధీర్ నటుడిగా ఎప్పటికీ మెరుగుపడడేమో అన్న అభిప్రాయాలు వ్యక్తమయ్యాయి.

కానీ ‘కృష్ణమ్మ కలిపింది ఇద్దరినీ’ అనే సినిమాతో తొలిసారి సుధీర్‌లో ఉన్న నటుడు బయటికి వచ్చాడు. ఆ సినిమా పెద్దగా ఆడకపోయినా సుధీర్ నటనకు మాత్రం ప్రశంసలు దక్కాయి. ఆ తర్వాత నన్ను దోచుకుందువటే చిత్రంతో ఇంకో మెట్టు ఎక్కాడు. ఇక ‘సమ్మోహనం’ సంగతైతే చెప్పాల్సిన పని లేదు. చాలామంది ఈ సినిమాలో సుధీర్ పెర్ఫామెన్స్ చూసి షాకైపోయారు. తనలో ఇంత మంచి నటుడున్నాడా అనుకున్నారు.

ఐతే ‘సమ్మోహనం’తో మంచి పేరు సంపాదించడమే కాక సక్సెస్ కూడా అందుకున్న సుధీర్.. ఆ తర్వాత ఇప్పటిదాకా ఒక్క హిట్ కూడా అందుకోలేకపోయాడు. ఎంతో కష్టపడి చేసిన ‘వి’తో పాటు శ్రీదేవి సోడా సెంటర్, ఆ అమ్మాయి గురించి మీకు చెప్పాలి తనకు నిరాశనే మిగిల్చాయి. కానీ ఈ చిత్రాల్లో కూడా తన నటనకు వంక పెట్టడానికి వీల్లేకపోయింది. నటుడిగా అతను ప్రతి సినిమాకూ పరిణతి చెందుతున్న విషయం స్పష్టంగా కనిపించింది.

ఇక ఇప్పుడు ‘హంట్’ మూవీతో సుధీర్ బాబు మరోసారి మెప్పించాడు. ఇందులో అతడిది డిఫరెంట్ షేడ్స్ ఉన్న క్యారెక్టర్. దానికి నెగెటివ్ టచ్ కూడా ఉంది. క్లైమాక్సులో తన పాత్రకు సంబంధించిన ట్విస్టే సినిమాలో మేజర్ హైలైట్. ఆ ట్విస్టు బయట పడ్డపుడు.. ఆ తర్వాతి సన్నివేశాల్లో సుధీర్ నటన ఆశ్చర్యపరుస్తుంది. ఎక్కువ హడావుడి చేయకుండా సటిల్‌గా ఆ సన్నివేశాల్లో అతను పెర్ఫామ్ చేసిన తీరు కట్టిపడేస్తుంది. నటుడిగా అతనెంత మెచ్యూరిటీ సాధించాడో ఈ సన్నివేశాలే చాటిచెబుతాయి. కానీ ప్లాట్ పాయింట్, ట్విస్టు బాగున్నా సినిమా ఓవరాల్‌గా అంత ఆకట్టుకునేలా లేకపోవడం దీనికి మైనస్. మంచి కథలు పడితే సుధీర్ బాబు తన పెర్ఫామెన్స్‌తో మరింత ఎలివేట్ చేయగలడన్నది స్పష్టం. కాబట్టి ఇకనైనా సినిమాల ఎంపికలో కొంచెం జాగ్రత్తగా అడుగులు వేయాల్సిన అవసరముంది.