Gulte Telugu Telugu Political and Movie News Updates
స‌ల్మాన్ ఖాన్ త‌మ్ముడు అర్బాజ్ ఖాన్ నుంచి మ‌లైకా అరోరా విడిపోతుంద‌ని ఎవ్వ‌రూ ఊహించి ఉండ‌రు. ఎందుకంటే సినిమాల్లో మ‌లైకా పెద్ద పేరు సంపాదించ‌క‌పోయినా.. బాలీవుడ్లో ఓ పెద్ద కుటుంబానికి కోడ‌లైంది. అర్బాజ్‌తో క‌లిసి దశాబ్దంన్నర పాటు అన్యోన్యంగా వైవాహిక జీవితం సాగించింది. వాళ్లిద్దరి పిల్లలు కూడా పెరిగి పెద్దవాళ్లవుతున్న తరుణంలో ఆమె భర్త నుంచి విడిపోవడం అందరినీ ఆశ్చర్యపరిచింది.
దీనికి మించిన షాక్ ఏంటంటే.. తనకంటే పన్నెండేళ్లు చిన్నవాడైన యువ కథానాయకుడు అర్జున్ కపూర్‌తో మ‌లైకా కొత్త బంధం మొదలుపెట్ట‌డం. ఐదారేళ్ల నుంచి అత‌డితోనే స‌హ‌జీవ‌నం చేస్తున్న మ‌లైకా.. త‌న మాజీ భర్త గురించి ఇప్ప‌టికీ చాలా పాజిటివ్‌గానే మాట్లాడుతుండ‌డం విశేషం. త‌మ దారులు వేరు కావ‌డంతో విడాకులు తీసుకోవాల్సి వ‌చ్చింది కానీ.. అర్బాజ్ చాలా మంచోడ‌ని, త‌నంటే అత‌డికి చాలా ప్రేమ అని ఆమె ఒక షోలో వెల్ల‌డించింది.
అర్బాజ్‌కు మొద‌ట ప్ర‌పోజ్ చేసింది కూడా త‌నేన‌ని ఈ షోలో మ‌లైకా వెల్ల‌డించ‌డం విశేషం. ఇప్ప‌టివ‌ర‌కు ఎవ‌రికీ తెలియ‌ని విష‌యం ఏంటంటే.. అర్బాజ్‌కు మొద‌ట ప్ర‌పోజ్ చేసింది నేనే. నాకు మిమ్మ‌ల్ని పెళ్లి చేసుకోవాల‌ని ఉంది, మీరు సిద్ధంగా ఉన్నారా అని త‌నే అత‌ణ్ని అడ‌గ్గా.. అర్బాజ్ వెంట‌నే ఒప్ప‌కున్నాడు. ఐతే జీవితంలో మేం విభిన్న అంశాల‌ను కోరుకోవ‌డంతో విడిపోయాం. కానీ ఆయ‌న ఎంతో మంచి వ్య‌క్తి. న‌న్ను ఎంతో మార్చాడు. ఈ రోజు నేనిలా ఉన్నానంటే ఆయ‌నే కార‌ణం.
ఇంకా అర్బాజ్‌కు నా మీద ప్రేమ త‌గ్గ‌లేదు. ఇటీవ‌ల నాకో ప్ర‌మాదం జ‌రిగి ఆప‌రేష‌న్ చేయించుకోవాల్సి వ‌చ్చింది. అప్పుడు ఆప‌రేష‌న్ థియేట‌ర్ నుంచి బ‌య‌టికి రాగానే అక్క‌డ నా కోసం వేచి ఉన్నాడు అంటూ త‌న మాజీ భ‌ర్త‌పై ప్ర‌శంస‌లు కురిపించింది మ‌లైకా. ఇదిలా ఉండ‌గా.. మ‌లైకా త్వ‌ర‌లోనే అర్జున్‌ను పెళ్లాడ‌బోతున్న‌ట్లుగా జోరుగా ప్ర‌చారం జ‌రుగుతోంది.
