ఆమిర్ కెరీర్లో తొలిసారి

ఆమిర్ ఖాన్ ఎంత గొప్ప నటుడో కొత్తగా చెప్పాల్సిన పని లేదు. పాత్రలో కొంచెం విషయం ఉంటే.. దాన్ని తన నటనతో మరో స్థాయికి తీసుకెళ్లగల నైపుణ్యం అతడి సొంతం. లగాన్, త్రీ ఇడియట్స్, పీకే, దంగల్ లాంటి చిత్రాల్లో అతడి నటన గురించి ఎంత చెప్పినా తక్కువే. ఆమిర్‌లో ఉన్న ప్రత్యేకత ఏంటంటే.. తాను గొప్ప నటుడిని అని చాటుకోవడానికి అతను అతి ఏమీ చేయడు. హద్దులు దాటి నటించడు. పాత్రకు తగ్గట్లుగా కొలిచినట్లు నటించడం అతడి ప్రత్యేకత. అతను ఎక్కువమందికి చేరువ అయితే ఈ తరహా నటనతోనే.

అలాంటి మేటి నటుడు ఇప్పుడు ఒక పాత్రతో తనకున్న పేరును చెడగొట్టేసుకున్నాడు. ఆ క్యారెక్టర్.. లాల్ సింగ్ చడ్డా అని చెప్పడానికి సందేహించాల్సిన పని లేదు. హాలీవుడ్ క్లాసిక్ ‘ఫారెస్ట్ గంప్’ ఆధారంగా ఆమిర్ నటించిన ‘లాల్ సింగ్ చడ్డా’ గురువారమే ప్రేక్షకుల ముందుకు వచ్చింది. ఈ సినిమాకు విడుదల ముంగిట ఉన్న నెగెటివిటీ చాలదని.. టాక్ కూడా చాలా బ్యాడ్‌గా వచ్చింది.

మామూలుగా తన సినిమాలకు ఆమిర్ పెద్ద బలం అవుతుంటాడు. సినిమా ఎలా ఉన్నా కూడా అతడి పాత్ర, నటన మెప్పిస్తుంటాయి. ‘లాల్ సింగ్ చడ్డా’ మాత్రం ఇందుకు మినహాయింపు. ఈ సినిమాకు పెద్ద మైనస్సే ఆమిర్ అంటే ఆయన అభిమానులు ఫీలవ్వాల్సిన పని లేదు. ఒరిజినల్లో టామ్ హాంక్స్ పాత్ర చేయడానికి ఆమిర్‌ను మించిన ఆప్షన్ లేదని ఎవరైనా ఒప్పుకోవాల్సిందే. ఐతే ఉన్నదున్నట్లుగా ఈ పాత్రను చేస్తే టామ్ హాంక్స్‌ను అనుకరించినట్లు ఉంటుందని అనుకున్నాడేమో.. ఆమిర్ ఆ పాత్రను ఇంకొంచెం ఇంప్రొవైజ్ చేద్దామని చూశాడు. బుద్ధి మాంద్యత ఉన్న పాత్రలో హావభావాలు, నటన పరంగా కొంచెం అతి చేశాడు.

కానీ అదే  పెద్ద సమస్యగా మారింది. ఆ పాత్ర అసహజంగా, కృత్రిమంగా తయారైంది. పాత్ర ఔచిత్యం దెబ్బ తిని.. ఇంత తేడాగా ఉన్న వ్యక్తి ఆర్మీలో చేరడం ఏంటి.. యుద్ధానికి వెళ్లడం ఏంటి అనే ప్రశ్నలు తలెత్తాయి. ఆ పాత్ర మీద ఆపేక్ష కలగాల్సింది పోయి.. చాలాసార్లు చికాకు కలుగుతుందంటే దాన్ని ఆమిర్ ఎంతగా చెడగొట్టేశాడో అర్థం చేసుకోవచ్చు. కెరీర్లో తొలిసారిగా ఒక పాత్రకు ఆమిర్ మిస్ ఫిట్ అయ్యాడు, దాన్ని సరిగా చేయలేదు అనే భావన కలిగింది బహుశా ఈ చిత్రంలోనే కావచ్చు. హీరో పాత్రతో ప్రేక్షకులు ట్రావెల్ చేయడాన్ని బట్టే ఈ సినిమా ఫలితం ఆధారపడి ఉండగా.. అక్కడే తేడా కొట్టడంతో డిజాస్టర్ టాక్ ఎదురుకోక తప్పలేదు.