ట్రోలింగ్ కి దొరికిపోయిన లైగర్

సోషల్ మీడియా చాలా యాక్టివ్ గా ఉన్న జమానాలో పోస్టర్లు టీజర్లు వదిలే విషయంలో దర్శక నిర్మాతలు చాలా జాగ్రత్తగా ఉండాలి. లేదంటే ట్రోలింగ్ కి టార్గెట్ అయిపోయి హాట్ టాపిక్ గా మారిపోవడం ఒక్కోసారి నెగటివ్ పబ్లిసిటీకి దారి తీయొచ్చు. లైగర్ వరస చూస్తుంటే అలాగే ఉంది. ఇందాక ఈ సినిమా తాలూకు ఒక కొత్త పోస్టర్ ని టీమ్ రిలీజ్ చేసింది. విజయ్ దేవరకొండ దాదాపు నగ్నంగా ఉన్న ఈ స్టిల్ లో ప్రైవేట్ పార్ట్ మీద రోజా పూల గుత్తిని అడ్డం పెట్టడం తప్ప మిగిలినదంతా ఓపెన్ గా చూపించేసి ఆన్లైన్ లో వదిలారు.

మాములుగా అయితే ఇదో ట్రెండ్ సెట్టింగ్ టాపిక్ అయ్యేది. కానీ ఇదే తరహాలో గతంలోనూ ఫస్ట్ లుక్కులు వచ్చాయి కాబట్టి ఆటోమేటిక్ గా పోలికలు తెస్తూ రౌడీ బాయ్ ని పూరి జగన్నాధ్ ని టార్గెట్ చేస్తున్నారు నెటిజెన్లు. కొన్ని నెలల క్రితం సంపూర్ణేష్ బాబు క్యాలీఫ్లవర్ కు అచ్చం ఇలాగే టైటిల్ లో కాయగూరను హీరో బాడీ మీద చూపించి పబ్లిసిటీ చేశారు. ఇదీ ఒరిజినల్ ఐడియా కాదు. అమీర్ ఖాన్ పీకే టైంలో ఇదే తరహాలో న్యూడ్ బాడీ మీద రేడియో అడ్డం పెట్టుకున్న పోజు అప్పట్లో ఎంత వైరల్ అయ్యిందో ఫ్యాన్స్ తో అందరికీ గుర్తే.

సరిగ్గా ఇక్కడే లైగర్ దొరికిపోయాడు. ఇదెక్కడి క్రియేటివిటీ అంటూ కామెంట్లు వచ్చి పడుతున్నాయి. అయినా కంటెంట్ మాట్లాడితే బాగుంటుంది కానీ ఇలాంటి వైరల్ పోస్టర్లతో జనం సెటైర్లు వేసేలా చేయడం ఏమిటనే విమర్శలు లేకపోలేదు. ఇవన్నీ విజయ్ పూరి ఛార్మీలకు తెలిసే జరిగిందో లేక ఈ ఐడియా వేసినవాళ్లకు పైన చెప్పిన రెండు సినిమాలు గుర్తుకు రాలేదో ఏమో కానీ మొత్తానికి టాక్ అఫ్ ది మీడియాగా దీన్ని మార్చేశారు. ఆగస్ట్ 25న విడుదల కాబోతున్న లైగర్ తో అనన్య పాండే హీరోయిన్ గా పరిచయమవుతోంది