తగ్గేదేలే.. ఇదేం రీచ్ అయ్యా

ఏ ముహూర్తాన సుకుమార్ ‘పుష్ప’ సినిమా కోసం ‘తగ్గేదే లే’ అనే డైలాగ్ రాశాడో.. బన్నీకి ఆ మేనరిజం సెట్ చేశాడో కానీ.. అది జనాల్లోకి మామూలుగా వెళ్లలేదు. దాని రీచ్ గురించి ఎంత చెప్పినా తక్కువే. ఇది బేసిగ్గా తెలుగు సినిమానే కానీ.. ఇక్కడ కంటే కూడా హిందీలో డబ్బింగ్ వెర్షన్ సాధించిన విజయం అసాధారణం.

ఒక డబ్బింగ్ సినిమా అసలేమాత్రం ప్రమోషన్లు లేకుండా.. పెద్దగా అంచనాల్లేకుండా రిలీజై హిందీలో వంద కోట్ల దాకా వసూళ్లు సాధించిందంటే అదెంత పెద్ద సక్సెసో చెప్పేదేముంది? హిందీ వెర్షన్ ద్వారానే ఇందులో ‘మై జుకేగా నహీ’ (హిందీలో తగ్గేదే లే అని అర్థం) అనే డైలాగ్, మెడ దగ్గర చేయి పెట్టి బన్నీ ఇచ్చిన మేనరిజం జాతీయ, అంతర్జాతీయ స్థాయిలో పాపులర్ అయ్యాయి. ఆ రీచ్ ఏ స్థాయికి వెళ్లిందటే.. ఎక్కడో బంగ్లాదేశ్‌లో క్రికెట్ లీగ్ జరుగుతుంటే.. అక్కడ డ్వేన్ బ్రావో బన్నీ మేనరిజంను ఇమిటేట్ చేశాడు.

అలాగే యూరప్‌లో ఒక ఫుట్ బాల్ లీగ్ సందర్భంగా ఓ ఆటగాడు కూడా బన్నీని అనుకరించాడు. ఇప్పుడు ఈ మేనరిజం ప్రఖ్యాత డబ్ల్యూడబ్ల్యూఈ లీగ్‌లోనూ కనిపించడం విశేషం. మధ్యప్రదేశ్‌కు చెందిన ప్రముఖ రెజ్లర్ సౌరభ్ గుర్జార్ డబ్ల్యూడబ్ల్యూఈలో బన్నీ పుష్ప మేనరిజంని ఇమిటేట్ చేయడం విశేషం. అతను కొంత కాలంగా ఈ లీగ్‌లో పోటీ పడుతున్నాడు.

ఒక బౌట్ సందర్భంగా ప్రత్యర్థిని చిత్తు చేయడానికి ముందు మెడ కింద చేయి పెట్టి బన్నీ మేనరిజంని ఇమిటేట్ చేశాడు. ఆ తర్వాత ప్రత్యర్థిని ఇరగదీశాడు. ఈ వీడియోను స్వయంగా సౌరభ్ గుర్జారే ట్విట్టర్లో షేర్ చేయడం విశేషం. అతను బన్నీని ట్యాగ్ కూడా చేశాడు. దీనిపై ఐకాన్ స్టార్ కాస్త ముందో వెనుకో స్పందించకుండా ఉండడు. ఇలా ఓ తెలుగు సినిమాలో హీరో మేనరిజంకి ఇంత రీచ్ రావడం అన్నది ఊహించని విషయం. దీన్ని బట్టి ‘పుష్ప-2’ మీద ఏ స్థాయిలో అంచనాలు నెలకొనబోతున్నాయో.. దానికి ఏ రేంజిలో ఓపెనింగ్స్ ఉంటాయో అంచనా వేయొచ్చు.