తమిళ నటుడిని పెళ్లాడేసిన తెలుగు హీరోయిన్

మధుశాలిని గుర్తుందా? తన మోడర్న్ లుక్స్ చూసి, మోడల్‌గా కెరీర్ ఆరంభంలో తను చేసిన ప్రకటనలు అవీ చూసి చాలామంది ఏ ముంబయి భామో అయ్యుంటుదని అనుకున్నారు. కానీ ఆమె అచ్చ తెలుగు అమ్మాయే పొరుగింటి పుల్లకూర రుచి అన్నట్లుగా మన హీరోయిన్లు ఎంత అందంగా ఉన్నా, ఎంత టాలెంట్ ఉన్నా మన దర్శక నిర్మాతలు పెద్దగా పట్టించుకోరు. వేరే భాషల కథానాయికలకే ప్రాధాన్యం ఇస్తారు. మధుశాలినికి అన్నీ ఉన్నా కూడా ఈ కారణంతోనే ఒక స్థాయికి మించి ఎదగలేకపోయింది.

కితకితలు, ఆగంతకుడు లాంటి చిన్న సినిమాలకే పరిమితం అయింది. హీరోయిన్‌గా అవకాశాలు తగ్గాక ఆమె క్యారెక్టర్ రోల్స్ కూడా చేసింది. ఆ సమయంలోనే తమిళం నుంచి అవకాశాలు రావడంతో అటు వెళ్లిపోయింది. ‘వాడు వీడు’ సహా అక్కడ చెప్పుకోదగ్గ స్థాయిలోనే సినిమాలు చేసింది. ఇప్పుడు తన జీవిత భాగస్వామిని కూడా మధుశాలిని కోలీవుడ్లోనే వెతుక్కోవడం విశేషం.

గోకుల్ అనే యువ నటుడిని మధుశాలిని చడీచప్పుడు లేకుండా పెళ్లాడేసింది. అసలు మధుశాలిని ప్రేమ గురించి కూడా పెద్దగా చర్చ లేదు. నేరుగా పెళ్లితోనే ఆమె వార్తల్లోకి వచ్చింది. గోకుల్ అక్కడంత పాపులర్ నటుడేమీ కాదు. చిన్నా చితకా సినిమాలే చేశాడు. కానీ మంచి అందగాడిగా పేరుంది. అతడితో మధుశాలిని పరిచయం ప్రేమగా మారి.. ఇద్దరూ పెళ్లి వైపు అడుగులు వేశారు. చూడ్డానికి చిన్నమ్మాయిలా కనిపిస్తుంది కానీ.. మోడలింగ్‌తో మొదలుపెడితే మధుశాలినిది రెండు దశాబ్దాల కెరీర్ కావడం విశేషం. చివరగా ఆమె తెలుగులో ‘గూఢచారి’ సినిమాలో ప్రత్యేక పాత్రలో మెరిసింది. ఇటీవల హాట్ స్టార్ వెబ్ సిరీస్ ‘9 అవర్స్’లోనూ నటించింది.

తమిళంలో కూడా సినిమాలు, వెబ్ సిరీస్‌ల్లో నటిస్తోంది మధు. పెళ్లి తర్వాత కూడా ఆమె కెరీర్‌ను కొనసాగించాలని నిర్ణయించుకుంది. గోకుల్ కూడా నటుడే కావడంతో ఆ విషయంలో అభ్యంతరాలు లేకపోవచ్చు. సోషల్ మీడియాలో ఈ జంటకు శుభాకాంక్షలు వెల్లువెత్తుతున్నాయి.