నానీ సుందరం VS ఛార్లీ శునకం

వచ్చే నెల జూన్ 10న నాని అంటే సుందరానికి విడుదల కాబోతున్న సంగతి తెలిసిందే. మైత్రి మూవీ మేకర్స్ ప్రస్తుతం సర్కారు వారి పాట సంబరాల్లో ఉన్నారు కాబట్టి అవి పూర్తి కాగానే న్యాచురల్ స్టార్ కోసం ప్రమోషన్లు మొదలుపెడతారు. ఆ తేదీకి వస్తున్న మరో పోటీ చిత్రం 777 ఛార్లీ ఒకటే. అతడే శ్రీమన్నారాయణతో మనకూ పరిచయమైన రక్షిత్ శెట్టి హీరోగా నటిస్తుండగా టైటిల్ రోల్ ని ఓ కుక్క పోషిస్తోంది. గ్రాఫిక్స్ కాదండోయ్. నిజం శునకాన్నే వాడామని యూనిట్ చెబుతోంది. ప్రత్యేక అనుమతులు తెచ్చుకున్నారు.

సరే దీంతో నానికి పోటీ ఏంటని అభిమానులు అనుకోవచ్చు. కానీ ఇప్పుడున్న పరిస్థితుల్లో ఎవరినీ తక్కువంచనా వేయడానికి లేదు. హిందీతో కలిపి 777 ఛార్లీ అయిదు భాషల్లో వస్తోంది. సురేష్ ప్రొడక్షన్స్ సంస్థ తెలుగు వెర్షన్ ని విడుదల చేస్తోంది. ట్రైలర్ రిలీజ్ చేస్తే ఇంకా రెండు రోజులు గడవకుండానే మూడు మిలియన్ల వ్యూస్ కి దగ్గరగా వెళ్లిపోయింది. జీవితంలో అన్ని వదిలేసి ఒంటరిగా బ్రతుకుతున్న ఓ నిరాశావాది యువకుడి దగ్గరకి ఓ కుక్క వచ్చాక అతని లైఫ్ లో జరిగే అద్భుతాల సారమే 777 ఛార్లీ అసలు కథ.

సోషల్ మీడియా వేదికగా దీన్ని సెలబ్రిటీలు బాగానే షేర్ చేస్తున్నారు. అఫ్కోర్స్ రానా స్నేహాలు ఇక్కడ ఉపయోగపడుతున్నాయి లెండి. ఎటొచ్చి అంటే సుందరానికి మాత్రం మూడు భాషల్లోనే రిలీజ్ చేస్తున్నారు. మార్కెట్ పరంగా చూసుకున్నా ఇమేజ్ లెక్కలు వేసుకున్నా నాని మూవీతో 777 ఛార్లీ సమానం కాదు కానీ స్టార్లకు అతీతంగా కంటెంట్ మార్కెట్ ని శాశిస్తున్న తరుణంలో ఫలితాలు ఎలా వస్తాయో చెప్పలేం. వివేక్ ఆత్రేయ దర్శకత్వం వహిస్తున్న అంటే సుందరానికిలో హీరోయిన్ పుష్ప విలన్ ఫహద్ సతీమణి నజ్రియా.