వ‌చ్చే వారం సినిమాలు గ‌ప్‌చుప్‌

ఏప్రిల్ 14న కేజీఎఫ్‌-2 రిలీజ్. 29న ఏమో ఆచార్య వ‌స్తోంది. మ‌ధ్య‌లో ఖాళీగా ఉన్న వారాన్ని వాడుకోవ‌డానికి ఏ పెద్ద, మీడియం రేంజ్ సినిమా కూడా ముందుకు రాలేదు. దీంతో ఆ వారంపై చిన్న సినిమాలు క‌న్నేశాయి. ఇదే మంచి ఛాన్స్ అన్న‌ట్లు మూడు చిన్న చిత్రాలు ఆ వారానికి బెర్తులు బుక్ చేసుకున్నాయి. అందులో ఒక‌టి విశ్వ‌క్సేన్ సినిమా అశోక‌వ‌నంలో అర్జున క‌ళ్యాణం అయితే.. ఇంకోటి నాగ‌శౌర్య మూవీ కృష్ణ వ్రింద విహారి. మ‌రొక చిత్రం.. సుమ ప్ర‌ధాన పాత్ర పోషించిన జ‌య‌మ్మ పంచాయితీ.

ఈ మూడు చిత్రాల‌కూ కొన్ని వారాల ముందే రిలీజ్ డేట్లు ఖ‌రార‌య్యాయి. కొంచెం ఆర్భాటంగానే అనౌన్స్‌మెంట్లు ఇచ్చారు. ఈ దిశ‌గా కొంత వ‌ర‌కు ప్ర‌మోష‌న్లు కూడా చేశారు. కానీ ఉన్న‌ట్లుండి ఈ మూడు చిత్రాల మేక‌ర్స్ సైలెంట్ అయిపోయారు. కేజీఎఫ్‌-2 మేనియాకు భ‌య‌ప‌డే ఇదంతా.

ఆర్ఆర్ఆర్ సినిమా బాగా ఆడుతుండ‌గా, ఇంకో వారంలో కేజీఎఫ్‌-2 రాబోతుండ‌గా.. ధైర్యం చేసి గ‌త వారం గ‌ని సినిమాను రిలీజ్ చేసింది చిత్ర బృందం. ఫ‌లితం తెలిసిందే. జ‌నాలు ఆ సినిమా వైపు క‌న్నెత్తి కూడా చూడ‌లేదు. దీంతో క‌నీస స్థాయిలో కూడా ఓపెనింగ్స్ రాక వ‌రుణ్ కెరీర్లోనే అతి పెద్ద డిజాస్ట‌ర్‌గా నిలిచింది. పెద్ద సినిమాల మ‌ధ్య ప‌డితే చిన్న‌, మీడియం సినిమాల ప‌రిస్థితి ఎలా ఉంటుందో చెప్ప‌డానికి ఇది ఉదాహ‌ర‌ణ‌. ఈ భారీ చిత్రాలను చూసేందుకు బాగా ఖ‌ర్చు పెడుతున్న ప్రేక్ష‌కులు చిన్న సినిమాల కోసం ప‌ర్స్ తీయ‌ట్లేదు.

కేజీఎఫ్‌-2 హ‌వా వారానికి పరిమితం అవుతుందా అన్నది చూడాలి. మరోవైపు ఇంకో వారం ఆగితేనేమో ఆచార్య వ‌చ్చేస్తుంది. దాని మీదా భారీ అంచ‌నాలే ఉన్నాయి. ఈ రెండు పెద్ద సినిమాల మ‌ధ్య వ‌స్తే ప్రేక్ష‌కుల దృష్టిలో ప‌డ‌టం క‌ష్టం. అందుకే 22వ తేదీకి షెడ్యూల్ అయిన మూడు చిత్రాలూ ప్ర‌స్తుతానికి గ‌ప్ చుప్ అయిపోయాయి. కేజీఎఫ్‌-2 ఫైనల్ టాక్, బాక్సాఫీస్ పెర్ఫామెన్స్‌ను బట్టి వాటి రిలీజ్ ఆధారపడి ఉంటుంది.