కేజీఎఫ్‌-2 దెబ్బ గ‌ట్టిగానే..

కేజీఎఫ్: చాప్ట‌ర్ 2 మీద అంచ‌నాలు ఏ స్థాయిలో ఉన్నాయో ప్ర‌త్యేకంగా చెప్పాల్సిన ప‌ని లేదు. మూడేళ్ల కింద‌ట పెద్దగా అంచ‌నాల్లేకుండా వ‌చ్చి చాప్ట‌ర్-1 వివిధ భాష‌ల్లో ఎంత‌టి సంచ‌ల‌న విజ‌యం అందుకుందో తెలిసిందే. అప్ప‌ట్నుంచి సెకండ్ పార్ట్ కోసం ఉత్కంఠ‌గా ఎదురు చూస్తున్నారు. అంతకంత‌కూ అంచ‌నాలు పెరిగాయే త‌ప్ప త‌గ్గ‌లేదు. ఎట్ట‌కేల‌కు ఆ చిత్రం థియేట‌ర్ల‌లోకి దిగుతోంది.

ఈ చిత్రాన్ని హిందీలో జ‌రుగుతున్న అడ్వాన్స్ బుకింగ్స్ చూసి బెంబేలెత్తి షాహిద్ క‌పూర్ క్రేజీ మూవీ జెర్సీని కూడా వాయిదా వేసుకోవాల్సి వ‌చ్చింది. ఐతే త‌మిళ సినిమా బీస్ట్‌ను మాత్రం కేజీఎఫ్‌-2కు పోటీగా నిల‌బెట్టేశారు. ఒక ద‌శ‌లో ఈ చిత్రాన్ని కూడా వాయిదా వేస్తార‌ని ప్ర‌చారం జ‌రిగింది.. విజ‌య్ ఉన్న ఫాంను చూసి నిర్మాత‌లు ధైర్యం చేసి కేజీఎఫ్‌-2 కంటే ఒక రోజు ముందు రిలీజ్‌కు సినిమాను రెడీ చేశారు.

ఐతే బీస్ట్ మూవీకి.. కేజీఎఫ్‌-2 దెబ్బ గ‌ట్టిగానే త‌గిలేలా ఉంది. కేజీఎఫ్‌-2 లేకుంటే త‌మిళ‌నాడులో ఉన్న థియేట‌ర్ల‌న్నింటిలో బీస్ట్‌నే వేసేసేవాళ్లు. అక్క‌డ కేజీఎఫ్‌-2కు క్రేజ్ త‌క్కువ‌గా ఏమీ లేదు. ఓ మోస్త‌రుగా దానికి స్క్రీన్లు ఇవ్వ‌క త‌ప్ప‌ని ప‌రిస్థితి. మ‌రోవైపు కేర‌ళ‌లోనూ విజ‌య్ సినిమాకు స్క్రీన్లు త‌గ్గేలా చేస్తోంది య‌శ్ సినిమా. తెలుగు రాష్ట్రాల్లో అయితే బీస్ట్‌కు బాగానే గండికొడుతోంది కేజీఎఫ్‌-2.

బిగిల్‌, మాస్ట‌ర్ లాంటి చిత్రాల‌తో పోలిస్తే దీనికి అడ్వాన్స్ బుకింగ్స్ ఆశించిన స్థాయిలో లేవు. ఆల్రెడీ ఆర్ఆర్ఆర్ కోసం బాగా ఖ‌ర్చు పెట్టారు తెలుగు ప్రేక్ష‌కులు. మ‌ళ్లీ కేజీఎఫ్‌-2 కోసం పెద్ద బ‌డ్జెట్టే పెట్టాల్సి వ‌స్తోంది. దీంతో బీస్ట్ మీద అంతగా ఆస‌క్తి చూపించ‌ట్లేదు. కేజీఎఫ్‌-2, బీస్ట్ చిత్రాలు రెంటినీ నైజాం వ‌ర‌కు దిల్ రాజే రిలీజ్ చేస్తున్నాడు.

కేజీఎఫ్‌-2 బుకింగ్స్ ఆల‌స్యం చేసినా.. బీస్ట్ బుకింగ్స్ పుంజుకోలేదు. ఉద‌య‌మే ఐదో షో వేసుకునే అవ‌కాశం ఉన్న‌ప్ప‌టికీ రెగ్యుల‌ర్ షోల‌కే బుకింగ్స్ అంతంత‌మాత్రంగా ఉండ‌టంతో చాలా థియేట‌ర్లు ఆ అవ‌కాశాన్నే ఉప‌యోగించుకోవ‌డం లేదు. బుధ‌వారం ఒక్క రోజైనా వీలైనంత మేర బీస్ట్ ద్వారా రాబ‌ట్టుకుందామంటే.. జ‌నాల దృష్టి కేజీఎఫ్‌-2 నుంచి మ‌ళ్ల‌డం లేదు. ఇక క‌ర్ణాట‌క‌, అలాగే నార్త్ ఇండియాలో అయితే బీస్ట్ రిలీజ్‌ను నామ‌మాత్రం చేసేసేలా ఉంది కేజీఎఫ్‌-2.