నాన్ బాహుబలి.. ఇక చరిత్రే

ఏడేళ్ల ముందు వరకు ఇండస్ట్రీ హిట్, ఆల్ టైమ్ రికార్డ్ అన్న మాటలు వాడేవాళ్లం. కానీ ‘బాహుబలి’ ఆగమనంతో ఈ మాటలు పక్కకు వెళ్లిపోయాయి. ‘నాన్ బాహుబలి రికార్డ్స్’ అనే కొత్త మాట ఒకటి తెరపైకి వచ్చింది. ఆ రికార్డులు వేరు.. మిగతా సినిమా రికార్డులు వేరు అన్నట్లు చూడటం మొదలైంది. అసాధారణ వసూళ్లు సాధించిన ఆ సినిమాతో వేరే చిత్రాలను పోల్చడానికి ఇబ్బందిగా మారింది.

వేరే సినిమాల రికార్డులను ‘నాన్-బాహుబలి’ కేటగిరీలో పెట్టడం మొదలైంది. ఓవరాల్‌గా ‘బాహుబలి’ రికార్డులను కొట్టడం సంగతి అలా ఉంచితే.. ఆ ఆలోచన చేయడానికి కూడా భయపడే పరిస్థితి తలెత్తింది. అప్పుడప్పుడు ఏదో ఒక ఏరియా వరకు మాత్రమే బాహుబలి రికార్డులు బద్దలవడం చూశాం కానీ.. ఓవరాల్‌గా దాని రికార్డుల జోలికి వెళ్లే పరిస్థితి ఎంతమాత్రం లేదు. తెలుగు సినిమాలే కాదు.. హిందీ చిత్రాలు సైతం ‘బాహుబలి’ రికార్డులు బద్దలు కొట్టలేకపోయాయి.

దీంతో ‘నాన్ బాహుబలి’ అనే కేటగిరీ ఎప్పటికీ నిలిచిపోయేలా కనిపించింది.కానీ ఇప్పుడు ‘ఆర్ఆర్ఆర్’ ఆగమనంతో ఎట్టకేలకు ‘బాహుబలి’ రికార్డులు బద్దలయ్యేలా కనిపిస్తున్నాయి. తన పేరిట ఉన్న రికార్డులను మళ్లీ రాజమౌళి బద్దలు కొట్టే సూచనలు కనిపిస్తున్నాయి. ఆల్రెడీ బడ్జెట్, బిజినెస్ పరంగా ‘నాన్ బాహుబలి’ అనే మాట పక్కకు వెళ్లిపోయింది. నాన్ ఆర్ఆర్ఆర్ రికార్డులు నమోదయ్యాయి. వసూళ్ల పరంగా కూడా ఇకపై ఇదే మాటను వాడబోతున్నామన్నది స్పష్టం.

‘ఆర్ఆర్ఆర్’కు ఉన్న హైప్, దానికి బాక్సాఫీస్ దగ్గర కలిసొస్తున్న పరిస్థితులు చూస్తుంటే.. తెలుగు రాష్ట్రాల వరకు బాహుబలి రికార్డులన్నీ బద్దలు కావడం లాంఛనం లాగే కనిపిస్తోంది. ఈ సినిమాకు మంచి టాక్ వచ్చి, మిగతా ప్రాంతాల్లోనూ ప్రేక్షకులు బాహుబలి చూడ్డానికి ఎగబడినట్లు ఎగబడితే.. ఓవరాల్ బాహుబలి రికార్డులన్నీ కూడా బద్దలైపోవడం ఖాయం. అదే జరిగితే.. ఇక ముందు ‘నాన్ ఆర్ఆర్ఆర్’ రికార్డులు అంటూ కొత్త మాటను ప్రతిసారీ వాడటం చూస్తాం. ‘నాన్ బాహుబలి’ అనే విభాగం చరిత్రలో కలిసిపోతుంది.