సక్సెస్‌ నిల్.. అయినా చాన్సులు ఫుల్‌

తాను క్యారెక్టర్ ఆర్టిస్టుగానే మిగిలిపోయినా తన కొడుకు మాత్రం మంచి హీరో కావాలని ఆశపడ్డారు సాయికుమార్. తండ్రి ప్రోత్సాహంతో హీరోగా ఎంట్రీ ఇచ్చాడు ఆది. మొదటి సినిమాతో మంచి పేరే తెచ్చుకున్నాడు. కానీ ఆ తర్వాతి నుంచి అదృష్టం అతనితో దోబూచులాడుతోంది.

సక్సెస్‌ అతని దగ్గరకు రాకుండా ఇబ్బంది పెడుతూనే ఉంది. అయినా కూడా తగ్గేదే లే అంటూ తనవంతు ప్రయత్నాలు చేస్తూనే ఉన్నాడు. నిజానికి ఆది చాలా కష్టపడతాడు. బాగా నటిస్తాడు. చక్కని డ్యాన్సర్ కూడా. కానీ ఎక్కడో తేడా కొడుతోంది. లక్‌ చేతికి చిక్కనంటోంది.

కెరీర్‌ డల్‌గానే ఉంటోంది. అలాగని అవకాశాలు లేవా అంటే.. కొందరు సక్సెస్‌ఫుల్ హీరోలకి కూడా లేనన్ని ఆఫర్స్ ఉన్నాయి ఆదికి. ప్రస్తుతం ఒకటీ రెండూ కాదు.. తీస్‌మార్‌‌ ఖాన్, కిరాతక, బ్లాక్, అమరన్‌ ఇన్‌ ద సిటీ, సీఎస్‌ఐ సనాతన్, జంగిల్ అంటూ ఆరు సినిమాల్లో యాక్ట్ చేస్తున్నాడు. ఇప్పుడు మరో సినిమాని మొదలుపెట్టాడు.     

కెకె రాధామోహన్‌ నిర్మాణంలో ఓ కొత్త సినిమాకి కమిటయ్యాడు ఆది. ఈ చిత్రంతో ఫణికృష్ణ దర్శకుడిగా పరిచయమవుతున్నాడు. ధృవన్ సంగీతం అందిస్తున్నాడు. ముత్యాల సతీష్ సినిమాటోగ్రాఫర్. ఇదో ఫ్యామిలీ ఎంటర్‌‌టైనర్‌‌ అని, అందరికీ నచ్చుతుందని దర్శక నిర్మాతలు నమ్మకంగా చెబుతున్నారు. దీంతో కలిసి ఏడు సినిమాలయ్యాయి. వీటిలో ఒక్కటైనా ఆది కెరీర్‌‌ని మలుపు తిప్పుతుందేమో చూడాలి.