మే 27.. ఒక క్లాసిక్ దిగబోతోంది

ఈ సారి వేసవికి సినిమాల సందడి మామూలుగా ఉండబోవట్లేదు. నెవర్ బిఫోర్ నెవర్ ఆఫ్టర్ అన్న తరహాలో భారీ చిత్రాలు సందడి చేయబోతున్నాయి. ఆర్ఆర్ఆర్, రాధేశ్యామ్, కేజీఎఫ్-2 లాంటి పాన్ ఇండియా సినిమాలకు తోడు సర్కారు వారి పాట, ఆచార్య.. ఇలా పెద్ద సినిమాలు చాలానే అభిమానులను అలరించబోతున్నాయి. వీటికి తోడు ఎఫ్-2, అంటే సుందరానికి, పక్కా కమర్షియల్, గని, లాంటి మీడియం రేంజ్ సినిమాల హంగామా కూడా ఉంది. వీటిలో ఒక్కొక్కటిగా రిలీజ్ డేట్లు ఖరారు చేసుకుంటున్నాయి.

ఇప్పుడు ఇంకో ఆసక్తికర చిత్రం విడుదల ఖాయమైంది. ఆ చిత్రమే.. మేజర్. ఫిబ్రవరి 11నే రావాల్సిన ఈ పాన్ ఇండియా చిత్రం.. కరోనా మూడో వేవ్ కారణంగా వాయిదా పడ్డ సంగతి తెలిసిందే. సరైన సమయంలో ఈ చిత్రానికి రిలీజ్ డేట్ ప్రకటిస్తామని హీరో, రైటర్ అడివి శేష్ ఇటీవల వెల్లడించాడు. ఇప్పుడతను డేట్ అనౌన్స్ చేసేశాడు.

మే 27న ‘మేజర్’ తెలుగు, హిందీ, మలయాళ భాషల్లో విడుదల కాబోతోంది. ఈ ప్రకటనను ఊరికే మాటలతో కాకుండా ఒక వీడియో రూపంలో ఇచ్చారు. 26/11 ముంబయి ఉగ్రవాద దాడుల సందర్భంగా టెర్రరిస్టులతో వీరోచితంగా పోరాడి మరణించిన మేజర్ ఉన్నికృష్ణన్ జీవిత కథ ఆధారంగా ఈ సినిమా తెరకెక్కిన సంగతి తెలిసిందే. ఆ దాడుల సందర్భంగా ఉన్నికృష్ణ వీరత్వాన్ని చూపించే ఒక కళ్లు చెదిరే గ్లింప్స్‌‌ను ఈ సందర్భంగా చూపించారు.

అది చూస్తే ‘మేజర్’ ఒక క్లాసిక్‌గా నిలవబోతోందని.. భారతీయ ప్రేక్షకులందరినీ ఉద్వేగానికి గురి చేసి వారి మనసులు గెలవబోతోందని అనిపిస్తోంది. ఇంతకుముందు అడివి శేష్‌తో ‘గూఢచారి’ చిత్రాన్ని రూపొందించిన శశికిరణ్ తిక్క ఈ చిత్రాన్ని రూపొందించాడు. అతడితో కలిసి శేష్ స్క్రిప్టు తీర్చిదిద్దాడు. మహేష్ బాబు సంస్థ జీఎంబీ ఎంటర్టైన్మెంట్స్‌తో కలిసి సోనీ సంస్థ ఈ చిత్రాన్ని రూపొందించింది. ఇందులో శేష్ సరసన బాలీవుడ్ భామ సయీ మంజ్రేకర్ నటించింది.