పుష్ప.. ఇది కదా రికార్డ్ అంటే

అల్లు అర్జున్, సుకుమార్‌ల క్రేజీ కాంబినేషన్లో తెరకెక్కిన ‘పుష్ప’ సినిమా థియేట్రికల్ రన్ ఎప్పుడో అయిపోయిందనే అనుకుంటున్నారు అంతా. ఈ చిత్రం తెలుగు, తమిళం, కన్నడ, మలయాళ భాషల్లో మూడు వారాల కిందటే అమేజాన్ ప్రైమ్‌లో రిలీజైపోయింది. దీంతో ఈ భాషలన్నింట్లో దాని థియేట్రికల్ రన్ ముగిసిన మాట వాస్తవం. సంక్రాంతి టైంలో హిందీ వెర్షన్ కూడా ప్రైమ్‌లో రిలీజైపోవడంతో ఆ భాషలో వసూళ్లకు తెరపడినట్లే అనుకున్నారు.

కానీ ప్రైమ్‌లో రిలీజయ్యాక కూడా ‘పుష్ఫ’ థియేటర్లలో సత్తా చాటడం విశేషం. అంతకుముందులా కాకపోయినా ఓ మోస్తరుగా వసూళ్లు కొనసాగాయి. నార్త్ ఇండియాలో రూరల్ ఏరియాల్లో ఈ సినిమా వసూళ్లు కొనసాగాయి. ప్రైమ్‌లో అందుబాటులో ఉన్నప్పటికీ థియేటర్లలో ఈ సినిమాను చూడ్డానికి ఆసక్తి ప్రదర్శించారు అక్కడి ప్రేక్షకులు. దీంతో తర్వాతి రెండు వారాల్లోనూ ఈ సినిమాకు చెప్పుకోదగ్గ స్థాయిలోనే వసూళ్లు వచ్చాయి. 

ఇప్పుడీ చిత్రం హిందీలో రూ.100 కోట్ల నెట్ వసూళ్ల మార్కును అందుకోవడం విశేషం. ప్రైమ్‌లో రిలీజవ్వడానికి ముందు ‘పుష్ప’ హిందీ వెర్షన్ వసూళ్లు రూ.86-87 కోట్ల మధ్య ఉన్నాయి. కాబట్టి 90 కోట్ల వద్ద రన్ ముగుస్తుందని అనుకున్నారు. కానీ గత రెండు వారాల్లో ఓ మోస్తరు వసూళ్లతో నడిచిన సినిమా ఎట్టకేలకు రూ.100 కోట్ల మార్కును టచ్ చేసింది. ప్రైమ్‌లో అందుబాటులో ఉన్నా కూడా ఇలా కలెక్షన్లు రాబట్టి వంద కోట్ల మార్కును అందుకోవడం గొప్ప విషయమే.

‘పుష్ప’ నార్త్ ఇండియాలో ఏ స్థాయిలో సంచలనం రేపిందో చెప్పడానికి ఇది రుజువు. ఈ సినిమాను హిందీ మార్కెట్లో రిలీజ్ చేసిన గోల్డ్ మైన్ ఫిలిమ్స్ వారికి నిజంగా గోల్డ్ మైన్ దొరికినట్లే అయింది. కేవలం పది కోట్లకే ఈ సినిమా హిందీ హక్కులను సొంతం చేసుకుందా సంస్థ. ‘పుష్ప’ నిర్మాతలకు ఇది కొంత బాధ కలిగించే విషయమే అయినా.. ‘పుష్ప-2’ బిజినెస్‌కు మాత్రం ఇది బాగా కలిసొచ్చేదే. సెకండ్ పార్ట్ హిందీ వరకే రూ.100 కోట్లు పలికినా ఆశ్చర్యం లేదేమో.