ఈ సినిమాను మనోళ్లు మిస్సయ్యారే..

విక్రమ్ వేద.. గత దశాబ్ద కాలంలో ఇండియన్ సినిమాలో వచ్చిన బెస్ట్ థ్రిల్లర్లలో కచ్చితంగా ఒకటనదగ్గ చిత్రమిది. సరికొత్త స్క్రీన్ ప్లేతో ఆద్యంతం ఉత్కంఠభరితంగా, ఆసక్తికరంగా సాగే ఈ థ్రిల్లర్ మూవీలో మాధవన్, విజయ్ సేతుపతి ముఖ్య పాత్రలు పోషించారు. ఒక గ్యాంగ్‌స్టర్, ఒక పోలీస్ మధ్య సాగే క్యాట్ అండ్ మౌస్ గేమ్ లాగా ఈ సినిమా నడుస్తుంది. ఇందులో ఊహించని ట్విస్టులుంటాయి. కథను చెప్పే విధానంలో కొత్తదనం కనిపిస్తుంది.

ముఖ్యంగా విజయ్ సేతుపతి చేసిన గ్యాంగ్‌స్టర్ పాత్ర అద్భుతం. సినిమా చూశాక కొన్నాళ్ల పాటు వెంటాడుతుందా పాత్ర. భార్యాభర్తలైన పుష్కర్-గాయత్రి ఈ సినిమాను రూపొందించడం విశేషం. హాలీవుడ్ స్థాయిలో కనిపించే ఈ థ్రిల్లర్ మూవీని తెలుగులో రీమేక్ చేయడానికి ప్రయత్నాలు జరిగాయి. హీరోలుగా రకరకాల పేర్లు కూడా వినిపించాయి. కానీ ఏమైందో ఏమో ఈ సినిమా పట్టాలెక్కలేదు. ఐతే కొన్నేళ్లుగా సౌత్ సినిమాలపై విపరీతమైన ఆసక్తి చూపిస్తున్న బాలీవుడ్ వాళ్లు మాత్రం ‘విక్రమ్ వేద’ను వదిలిపెట్టలేదు.

ఓ మోస్తరు హిట్టయ్యే సినిమాలే విడిచిపెట్టని వాళ్లు.. ఇంత పెద్ద హిట్‌ను ఎలా వదిలేస్తారు? హృతిక్ రోషన్-సైఫ్ అలీ ఖాన్ ప్రధాన పాత్రల్లో ‘విక్రమ్ వేద’ హిందీ రీమేక్ తెరకెకక్కుతోంది. పుష్కర్-గాయత్రిలే అక్కడా డైరెక్ట్ చేస్తున్నారు. హృతిక్ చేస్తున్నది విజయ్ సేతుపతి పాత్ర కావడం సినిమాపై ఆసక్తిని ఇంకా పెంచుతోంది. అతడి స్టార్ ఇమేజ్ కూడా తోడైతే ఈ పాత్ర ఇంకా బాగా పండుతుందని అంచనా వేస్తున్నారు. ఈ రోజు రిలీజ్ చేసిన హృతిక్ ఫస్ట్ లుక్ సినిమాపై అంచనాలను పెంచింది.

హిందీలో ఈ సినిమా బ్లాక్‌బస్టర్ కావడం గ్యారెంటీ అని ముందే అందరూ ఫిక్సయిపోయి ఉన్నారు. ఐతే కొత్తగా ఉంటూనే మాస్ ఎలివేషన్లకు స్కోప్ ఉన్న ఈ సినిమాను టాలీవుడ్ వదిలేయడమే ఆశ్చర్యం కలిగించే విషయం. విశేషం ఏంటంటే.. ఈ సినిమా సుకుమార్‌కు చాలా నచ్చేసి ఎవరైనా రీమేక్ ప్రపోజల్‌తో వస్తే డైరెక్ట్ చేద్దామని అనుకున్నాడట. మరి ఆయనే ఎవరైనా స్టార్ హీరోలను అప్రోచ్ కావాల్సింది. ఆయన దర్శకత్వంలో టాప్ స్టార్లు ఎవరైనా ఇందులో నటించి ఉంటే సినిమా మామూలుగా ఉండేది కాదేమో.