చిరు ఉండగా బన్నీ గోవిందా పేరు చెప్పాడేంటి?

మెగాస్టార్ చిరంజీవితో అల్లు అర్జున్ సంబంధాల మీద సందేహాలు రేకెత్తించేలా ఈ మధ్య తరచుగా ఏదో ఒక వివాదం రాజుకుంటూనే ఉంది. ఇంతకుముందులా బన్నీ ‘మెగా’ జపం చేయట్లేదు. చిరంజీవి లేకుండా నేను లేను అనే మాట అనట్లేదు. సాధ్యమైనంత వరకు ‘మెగా’ ముద్రను తొలగించుకోవడానికి.. సొంత ఇమేజ్ బిల్డ్ చేసుకోవడానికే ప్రయత్నిస్తున్నాడు.

‘అల వైకుంఠపురములో’ ఆడియో వేడుకలో.. తన ‘ఆర్మీ’కి ఏ రేంజిలో ఎలివేషన్ ఇచ్చాడో తెలిసిందే. అక్కడ ‘చిరు’, ‘మెగా’ మాటలే వాడలేదసలు. ఇక ఆ సినిమా నాన్-బాహుబలి హిట్ అయిన నేపథ్యంలో బన్నీ మరింతగా మెగా ముద్రకు దూరం జరుగుతున్నాడనే అభిప్రాయాలు వ్యక్తమవుతున్నాయి. తాజాగా ఓ ఇంటర్వ్యూలో అతను చెప్పిన మాటలు ఆశ్చర్యం కలిగిస్తున్నాయి.

బన్నీ అభిరుచుల గురించి ఓ పత్రిక వీక్లీలో ఆర్టికల్ వేశారు. అందులో బన్నీ తనకు నచ్చిన డ్యాన్సర్ గురించి చెప్పాడు. ఇండియాలోనే నంబర్ వన్ డ్యాన్సర్ అనిపించుకున్న చిరంజీవి తన ఫ్యామిలీలోనే ఉండగా.. అతను తన ఫేవరెట్ డ్యాన్సర్ గోవిందా అని చెప్పడం గమనార్హం. గోవిందా స్టెప్పులేస్తుంటే చూపు తిప్పుకోలేనంటూ బన్నీ వ్యాఖ్యానించాడు.

గోవిందానే తనకు డ్యాన్సుల్లో చిరంజీవి ఆదర్శం అన్నాడు. గోవిందాతో పోలిస్తే చిరు డ్యాన్సుల్లో ఎన్నో మెట్లు పైన ఉంటాడు. మరి చిరు కాకుండా గోవిందా తనకు నచ్చిన డ్యాన్సర్ అనడం మెగా అభిమానులకు ఆగ్రహం తెప్పిస్తోంది. చిరు డ్యాన్సుల గురించి గతంలో ఎంతగానో పొగిడి ఆయనే తనకు ఇన్‌స్పిరేషన్ అన్న బన్నీ.. ఇప్పుడు కొత్తగా గోవిందా పేరు చెప్పాడేంటని వాళ్లు ఆశ్చర్యపోతున్నారు.

అలాగే ఇన్‌స్పిరేషన్ ఎవరు అంటే కూడా అమితాబ్ బచ్చన్ పేరే చెప్పాడు ఈ ఇంటర్వ్యూలో బన్నీ. ఇక్కడా చిరు పేరు ప్రస్తావించకపోవడాన్ని చిరు ఫ్యాన్స్ తప్పుబడుతున్నారు. చిరు పేరు చెప్పుకుని ఎదిగిన బన్నీ.. ఇప్పుడు పెద్ద స్థాయికి చేరుకున్నాక ఉద్దేశపూర్వకంగానే చిరు పేరును అవాయిడ్ చేస్తున్నాడన్నది వారి ఆరోపణ.