RRR’ లో ల‌గాన్ ట్రాక్‌!

అమీర్ ఖాన్ ‘ల‌గాన్‌’ చిత్రాన్ని భార‌తీయ ప్రేక్షకులు ఎప్ప‌టికీ మ‌ర్చిపోరు. ఉత్త‌మ విదేశీ చిత్రం కేట‌రిగీలో నిలిచి ఆస్కార్ ఆశ‌ల్ని రేపిన సినిమా ఇది. ఆ త‌ర‌వాత మ‌రే సినిమా ఆ స్టేజీ వ‌ర‌కూ వెళ్ల‌లేదు. ఇప్పుడు రాజ‌మౌళి త‌న‌’RRR’లో ఆనాటి ల‌గాన్ ని గుర్తు చేయ‌బోతున్నాడు.

ల‌గాన్‌లో అమీర్ ఖాన్ ల‌వ్ ట్రాక్ గుర్తుంది క‌దా? ఓ బ్రిటీష్ దొర‌సాని క‌థానాయ‌కుడ్ని చూసి మ‌న‌సు ప‌డుతుంది. బ్రిటీష్ దేశ‌స్తురాలు అయ్యుండి.. క్రికెట్ ఆట‌లో భార‌తీయులు గెల‌వాల‌ని కోరుకుంటుంది. త‌నకు తోచిన స‌హాయం చేస్తుంటుంది. ఆ ట్రాక్ ని బాగా డీల్ చేశాడు ద‌ర్శ‌కుడు అశితోష్ గోవార్క‌ర్‌. ఇప్పుడు అలాంటి ల‌వ్ ట్రాకే ‘RRR’ లోనూ చూడ‌బోతున్నామ‌ని టాక్‌.

ఈ చిత్రంలో కొమ‌రం భీమ్‌గా ఎన్టీఆర్ న‌టిస్తున్న సంగ‌తి తెలిసిందే. త‌నకి జోడీగా హాలీవుడ్ నాయిన ఒలివియా మారిస్ న‌టిస్తోంది. త‌నో బ్రిట‌ష్ దొర‌సాని. కొమ‌రం భీమ్‌ని మ‌న‌స్ఫూర్తిగా ప్రేమిస్తుంది. బ్రిటీష్ దేశ‌స్తురాలు అయ్యుండి, బ్రిటీష్ వాళ్ల‌కు వ్య‌తిరేకంగా పోరాడుతున్న కొమ‌రం భీమ్‌కి స‌హాయ ప‌డుతుంది. ఆ త‌ర‌వాత‌.. ఏం జ‌రిగింద‌న్న‌దే మిగిలిన క‌థ‌.

దాదాపుగా ఈ ట్రాక్ ల‌గాన్‌ని పోలి ఉంది. కాక‌పోతే.. రాజ‌మౌళి మ్యాజిక్ వేరుగా ఉంటుంది. పాత కాన్సెప్టునే తీసుకొన్నా, కొత్త‌గా ముస్తాబు చేసి, మ్యాజిక్ చేయ‌డం త‌న‌కు బాగా అల‌వాటు. మ‌రి ఈసారి ఈ ప్రేమ‌క‌థ‌ని ఏ రేంజులో తెర‌కెక్కిస్తాడో చూడాలి.