‘ఆర్ఆర్ఆర్’ పై రాజమౌళి బిగ్ అప్డేట్

టాలీవుడ్ స్టార్ డైరెక్టర్ రాజమౌళి తెరకెక్కిస్తోన్న ‘ఆర్ఆర్ఆర్’ చిత్రంపై భారీ అంచనాలున్న సంగతి తెలిసిందే. సినీ శిల్పి జక్కన్న చెక్కుతోన్న ఈ పాన్ ఇండియా మూవీ కోసం ఇరు తెలుగు రాష్ట్రాలతోపాటు దేశవ్యాప్తంగా సినీ అభిమానులు ఆతృతగా ఎదురుచూస్తున్నారు. మెగా పవర్ స్టార్ రామ్ చరణ్, యంగ్ టైగర్ జూనియర్ ఎన్టీఆర్ వంటి స్టార్ హీరోలతో తెరకెక్కిన ఈ భారీ మల్టీస్టారర్ పై ఆ ఇద్దరు హీరోల ఫ్యాన్స్ ఎన్నో ఆశలు పెట్టుకున్నారు.

ఆ ఆశలకు, అంచనాలకు తగ్గట్టుగానే ‘ఆర్ఆర్ఆర్’ నుంచి ఇప్పటివరకు వచ్చిన ప్రతి అప్డేట్ కు అదిరిపోయే రెస్పాన్స్ వచ్చింది. జనవరి 7న ఈ చిత్రాన్ని ప్రపంచవ్యాప్తంగా 10 భాషల్లో రిలీజ్ చేసేందుకు చిత్ర యూనిట్ రెడీ అవుతోన్న నేపథ్యంలో ప్రమోషన్ కార్యక్రమాలు కూడా ఊపందుకున్నాయి. ఈ క్రమంలోనే ఈ చిత్ర ట్రైలర్ ఎప్పుడు విడుదలవుతందా అన్న ఆసక్తి సర్వత్రా ఏర్పడింది. ఎట్టకేలకు ఆ సస్పెన్స్ కు తెరదించుతూ తాజాగా ఆర్ఆర్ఆర్ చిత్ర యూనిట్ బిగ్ అప్డేట్ ఇచ్చింది.

ఆర్ఆర్ఆర్ సినిమా ట్రైలర్ ను డిసెంబర్ 3న విడుదల చేయబోతున్నట్టు అధికారికంగా చిత్ర యూనిట్ ప్రకటించింది. ఈ విషయాన్ని డీవీవీ ఎంటర్టైన్మెంట్స్ బ్యానర్ తన అఫీషియల్ ట్విటర్ హ్యాండిల్ లో షేర్ చేసింది. డివివి దానయ్య ‘ఆర్ఆర్ఆర్’ను 450 కోట్లకు పైగా భారీ బడ్జెట్‌తో నిర్మించిన ఈ చిత్రం బాహుబలి రికార్డులను బద్దలు కొడుతుందని అంచనా వేస్తున్నారు. ఇక, ఈ పీరియాడిక్ డ్రామా తమిళం, తెలుగు, హిందీ, మలయాళం, కన్నడ మరియు ఇంగ్లీష్ సహా దాదాపు 10 భాషల్లో వరల్డ్ వైడ్ థియాట్రికల్ రిలీజ్ కు రెడీ అవుతోంది.