అఖండ.. 2.37

నందమూరి బాలకృష్ణ, బోయపాటి శ్రీనుల క్రేజీ కాంబినేషన్లో తెరకెక్కిన ‘అఖండ’ మీద అంచనాలు ఏ స్థాయిలో ఉన్నాయో తెలిసిందే. మొదలైన దగ్గర్నుంచే ప్రేక్షకుల్లో మంచి హైప్ తెచ్చుకున్న ఈ చిత్రం.. ఇటీవల ట్రైలర్ లాంచ్ అయ్యాక అంచనాలు మరింత పెంచేసింది. ఇంకో 12 రోజుల్లోనే ‘అఖండ’ ప్రేక్షకుల ముందుకు రాబోతోంది. కాస్త ముందుగానే సినిమాకు సెన్సార్ కూడా పూర్తి చేసేసింది చిత్ర బృందం.

‘అఖండ’కు చిత్ర బృందం అంచనా వేసినట్లే యు/ఎ సర్టిఫికెట్ వచ్చింది. బోయపాటి సినిమాలంటేనే విపరీతమైన హింసతో కూడి ఉంటాయి. కాబట్టి క్లీన్ యు అంటే కష్టమే. ఈ సినిమా రన్ టైం ఎంత అన్న సమాచారం కూడా బయటికి వచ్చేసింది. నిడివి కాస్త ఎక్కువే అని సమాచారం. 2 గంటల 37 నిమిషాలతో ఫైనల్ కట్ రెడీ చేశాడట బోయపాటి.

బాలయ్యతో ఇంతకుముందు బోయపాటి రూపొందించిన చిత్రాలు ‘సింహా’, ‘లెజెండ్’ సైతం అటు ఇటుగా ఈ నిడివితో రిలీజైన చిత్రాలే. ‘సింహా’ రన్ టైం 2 గంటల 36 నిమిషాలు కాగా.. ‘లెజెండ్’ 2 గంటల 41 నిమిషాల నిడివితో వచ్చింది. సినిమాలో యాక్షన్ ఘట్టాలే దాదాపు 45 నిమిషాలు సాగుతాయన్ని యూనిట్ వర్గాల సమాచారం. ‘బాహుబలి’ తర్వాత అత్యధిక రోజులు యాక్షన్ ఘట్టాలను చిత్రీకరించిన చిత్రంగా ‘అఖండ’ రికార్డు నెలకొల్పినట్లు ఆ మధ్య వార్తలొచ్చిన సంగతి తెలిసిందే.

సినిమాలో యాక్షన్ ఘట్టాలే హైలైట్‌గా ఉంటాయని ఈ మధ్య రిలీజైన ట్రైలర్ చూసినా అర్థమైపోతుంది. ‘లెజెండ్’ సినిమాను గుర్తుకు తెచ్చేలా ఒక టెంప్లేట్ స్టయిల్లో బోయపాటి ఈ సినిమా తీసినట్లు కనిపిస్తోంది. సినిమాకు హైలైట్ అవుతుందని భావిస్తున్న అఖండ పాత్ర.. ‘లెజెండ్’లో ఫ్లాష్ బ్యాక్ క్యారెక్టర్ లాగే సినిమా మధ్యలో రంగప్రవేశం చేస్తుందని.. ఆ క్యారెక్టర్ వచ్చినప్పటి నుంచి అభిమానులకు గూస్ బంప్పే అని అంటున్నారు.