బాలయ్య కోసం నాని డ్రాప్ అవుతాడా..?

నందమూరి బాలకృష్ణ-బోయపాటి కాంబినేషన్ లో ‘అఖండ’ అనే సినిమా తెరకెక్కిన సంగతి తెలిసిందే. రీసెంట్ గానే ఈ సినిమా షూటింగ్ పూర్తయింది. ప్రస్తుతం పోస్ట్ ప్రొడక్షన్ కార్యక్రమాలు జరుగుతున్నాయి. ఇప్పటివరకు పెద్ద సినిమాలన్నీ కూడా తమ సినిమాల రిలీజ్ డేట్స్ ను అనౌన్స్ చేశాయి. కానీ ‘అఖండ’ మాత్రం రిలీజ్ డేట్ ను ప్రకటించలేదు. ‘ఆర్ఆర్ఆర్’ రిలీజ్ తో మిగిలిన సినిమాలన్నీ డేట్లు మార్చుకుంటున్నాయి. వాటిపై ఓ క్లారిటీ వస్తే తమ సినిమాను వదలడానికి చూస్తున్నారు బోయపాటి.

అందుతున్న సమాచారం ప్రకారం.. డిసెంబర్ 24న సినిమాను విడుదల చేయాలని భావిస్తున్నారట. ఎందుకంటే సంక్రాంతి బరిలో ఇప్పటికే రెండు పెద్ద సినిమాలు దిగుతున్నాయి. మరొకటి కూడా ఉండే ఛాన్స్ ఉంది. జనవరి మిస్ చేస్తే మళ్లీ మార్చి, ఏప్రిల్ వరకు ఆగాలి. అప్పుడు కూడా పెద్ద సినిమాలున్నాయి. దీంతో క్రిస్మస్ సీజన్ బెటర్ అని భావిస్తున్నారు. అయితే ఇక్కడ విషయమేమిటంటే.. అదే సమయానికి నాని తన ‘శ్యామ్ సింగరాయ్’ సినిమాను రిలీజ్ చేయాలనుకుంటున్నారు.

డిసెంబర్ 17న ‘పుష్ప’ ఎలానూ ఉంటుంది. ఒక వారం గ్యాప్ ఇచ్చి నాని తన సినిమాతో రావాలనుకున్నారు. కానీ ఇప్పుడు బాలయ్య పోటీగా వస్తుండడంతో డేట్ మార్చుకోవాల్సిన పరిస్థితి కలుగుతోంది. కానీ నాని ఆ డేట్ ని మిస్ చేస్తే మళ్లీ సరైన డేట్ ఎప్పుడు దొరుకుంతుందో చెప్పలేం. అలా అని బాలయ్య సినిమాతో పాటు రిలీజ్ చేసి కలెక్షన్స్ షేర్ చేసుకోలేరు. మరి ఈ విషయంలో బాలయ్య, నాని ఎలాంటి నిర్ణయం తీసుకుంటారో చూడాలి!