రిప‌బ్లిక్ వాయిదా త‌ప్ప‌దా?

క‌రోనా పుణ్యమా అని గ‌త ఏడాదిన్న‌ర కాలంలో ఎన్ని సినిమాలు ఎన్నిసార్లు రిలీజ్ డేట్లు మార్చుకున్నాయో తెలిసిందే. ఇంత‌కుముందు లాగా ఒక సినిమా వాయిదా ప‌డుతుంటే జ‌నాలేమీ ఆశ్చ‌ర్య‌పోవ‌ట్లేదు. గ‌త వారం వ‌చ్చిన సీటీమార్, ఈ వారం వ‌స్తున్న గ‌ల్లీ రౌడీ కూడా ఒక‌సారి రిలీజ్ డేట్ అనౌన్స్ చేశాక వాయిదా ప‌డ్డ‌వే. వ‌చ్చే వారానికి షెడ్యూల్ అయిన ల‌వ్ స్టోరి ఇంత‌కుముందు రెండుసార్లు వాయిదా ప‌డ్డ సంగ‌తి తెలిసిందే.

అక్టోబ‌రు 1న రావాల్సిన సాయిధ‌ర‌మ్ తేజ్ సినిమాకు కూడా ఇంత‌కుముందు ఒక డేట్ అనుకుని అనివార్య ప‌రిస్థితుల్లో వాయిదా వేశారు. అయితే తాజా డేట్ అక్టోబ‌రు 1న కూడా ఈ సినిమా విడుద‌ల కాక‌పోవ‌చ్చ‌ని అంటున్నారు. ఈ సినిమా షూటింగ్ పూర్త‌యింది. పోస్ట్ ప్రొడ‌క్ష‌న్ ప‌నులు కూడా జోరుగానే జ‌రుగుతున్నాయి.

కానీ అంతా ఓకే అనుకుంటున్న స‌మ‌యంలో తేజు రోడ్డు ప్ర‌మాదానికి గుర‌య్యాడు. అత‌డికి మ‌రీ తీవ్ర గాయాలేమీ కాలేదు. ప్రాణాపాయం లేదు. కానీ గాయాల నుంచి కోలుకుని మామూలుగా తిర‌గ‌డానికి మాత్రం టైం ప‌ట్టేలా ఉంది. వ‌చ్చే నెల రోజుల్లో మాత్రం ఇది జ‌ర‌గ‌క‌పోవ‌చ్చని తెలుస్తోంది. అత‌డి కాల‌ర్ బోన్‌కు శ‌స్త్ర‌చికిత్స కూడా జ‌ర‌గ‌డం తెలిసిందే. తేజు మ‌రికొన్ని రోజులు ఆసుప‌త్రిలోనే ఉండాల్సి రావ‌చ్చు. ఇంటికి చేరుకున్నా బయ‌టికి రావ‌డానికి టైం ప‌డుతుంది. సినిమా ప్ర‌మోష‌న్ల‌కు హీరోనే అత్యంత కీల‌కం. తేజు అలా ఉండ‌గా ప్ర‌మోష‌ణ్ల‌కు రాలేడు.

ప్ర‌మోష‌న్ల సంగ‌త‌లా ఉంచితే.. తేజు ఈ స్థితిలో ఉండ‌గా సినిమాను విడుద‌ల‌కు సిద్ధం చేయ‌డం క‌ష్ట‌మే. కాబ‌ట్టి అక్టోబ‌రు 1 నుంచి ఈ చిత్రాన్ని వాయిదా వేయ‌క త‌ప్ప‌క‌పోవ‌చ్చ‌ని అంటున్నారు. తేజు ప‌రిస్థితి చూసుకుని త్వ‌ర‌లోనే కొత్త డేట్ ప్ర‌క‌టించ‌వచ్చ‌ని భావిస్తున్నారు.