బన్నీకి నో బ్రేక్..!

స్టైలిష్ స్టార్ అల్లు అర్జున్ ప్రస్తుతం సుకుమార్ దర్శకత్వంలో ‘పుష్ప’ సినిమాలో నటిస్తున్నారు. రెండు భాగాలుగా ఈ సినిమాను తెరకెక్కిస్తున్నారు. మొదటి భాగాన్ని ఈ ఏడాది క్రిస్మస్ కానుకగా విడుదల చేయబోతున్నట్లు ప్రకటించారు. ప్రస్తుతం సినిమా షూటింగ్ చివరి దశకు చేరుకుంది. ఈ సినిమా తరువాత వెంటనే ‘ఐకాన్’ సినిమాను మొదలుపెట్టాలని ప్లాన్ చేస్తున్నారు బన్నీ. వేణుశ్రీరామ్ డైరెక్ట్ చేయనున్న ఈ సినిమా ప్రీ ప్రొడక్షన్ పనులు జరుగుతున్నాయి.

కొన్ని రోజుల్లో సినిమా షూటింగ్ కి సంబంధించిన అప్డేట్ రాబోతుంది. అందుకే ‘పుష్ప’ సినిమాను వీలైనంత త్వరగా పూర్తి చేసేస్తున్నారు బన్నీ. సెప్టెంబర్ చివరి నాటికి మొత్తం షూటింగ్ కంప్లీట్ చేసి అక్టోబర్ మొదటి వారంలోనే ‘ఐకాన్’ సెట్స్ పైకి వెళ్లబోతున్నారు మన స్టైలిష్ స్టార్. మధ్యలో బ్రేక్ తీసుకోవాలని కూడా బన్నీ అనుకోవడం లేదు. ‘ఐకాన్’ సినిమాను వచ్చే ఏడాది సమ్మర్ కి విడుదల చేయాలనేది ప్లాన్. దానికి తగ్గట్లుగానే షెడ్యూల్స్ వేసుకుంటున్నారు.

‘ఐకాన్’ను కూడా పాన్ ఇండియా నేపథ్యంలో తెరకెక్కించనున్నారు. భారీ బడ్జెట్ తో సినిమాను నిర్మించబోతున్నారు. ఈ సినిమాలో బన్నీ అల్ట్రా స్టైలిష్ లుక్ లో కనిపించబోతున్నారు. ఇందులో బన్నీకి జోడీగా పూజాహెగ్డేను తీసుకోవాలనుకుంటున్నారు. శ్రీ వెంకటేశ్వర క్రియేషన్స్ బ్యానర్ పై దిల్ రాజు ఈ సినిమాను నిర్మిస్తున్నారు.