బ‌న్నీ వాసుకు వేధింపులు.. సుంద‌ర్ పిచాయ్‌కి లేఖ‌

టాలీవుడ్ ప్ర‌ముఖ నిర్మాత‌ల్లో ఒక‌రైన బ‌న్నీ వాసుకు ఇంట‌ర్నెట్లో చేదు అనుభ‌వం ఎదురైంది. త‌న కుటుంబం గురించి త‌ప్పుడు ప్ర‌చారం జ‌ర‌గ‌డంపై ఆయ‌న మ‌న‌స్తాపం చెందాడు. ఈ ప్ర‌చారం వ‌ల్ల త‌న‌ కూతురిని చంపేస్తానంటూ ఒక వ్య‌క్తి బెదిరిస్తూ వీడియో పెట్ట‌డంపై వాసు ఆవేద‌న వ్య‌క్తం చేశాడు.

ఈ విష‌య‌మై వాసు గూగుల్‌ సీఈవో సుందర్‌ పిచాయ్‌కి టాలీవుడ్‌ ప్రముఖ నిర్మాత బన్నీ వాసు లేఖ రాయ‌డం గ‌మ‌నార్హం. సామాజిక మాద్యమాల్లో తప్పుడు ప్రచారం వల్ల తన కుమార్తె, తాను ఎంతో మానసిక క్షోభ అనుభవించినట్లు ఈ లేఖలో వాసు వెల్లడించాడు. ఒకరు పెట్టిన పోస్టు అబద్ధమని నిరూపించడం చాలా కష్టతరం అని, అదేంటో స్వయంగా తాను ఫేస్‌ చేశానని బ‌న్నీ వాసు ఆవేదన వ్యక్తం చేశాడు.

తన కూతురిని చంపుతానని ఓ వ్యక్తి సామాజిక మాద్యమాల్లో వీడియో పెడితే.. దాన్ని తీయించడానికి తల ప్రాణం తోకకు వచ్చిందని, చిత్ర పరిశ్రమలో ఎంతో కొంత పలుకుబడి ఉన్న తనకే ఇంత కష్టమైతే.. సామాన్యుల పరిస్థితి ఏంటని నేరుగా సుందర్‌ పిచాయ్‌ని ఈ లేఖ‌లో ప్రశ్నించాడు వాసు. ఇంటర్నెట్‌ స్వేచ్ఛకు మద్దతుగా ఇటీవల గూగుల్‌ సీఈవో సుందర్‌ పిచాయ్‌ చేసిన వ్యాఖ్యల పట్ల ఆయన అసంతృప్తి వ్యక్తం చేస్తూ బన్నీ వాసు ఈ లేఖ రాశాడు.

అల్లు అర్జున్‌కు అత్యంత స‌న్నిహితుడైన బ‌న్నీ వాసు ప్ర‌స్తుతం టాలీవుడ్ అగ్ర నిర్మాత‌ల్లో ఒక‌డు. అల్లు అర‌వింద్ నేతృత్వంలోని గీతా ఆర్ట్స్ వ్య‌వ‌హారాల‌న్నీ ఇప్పుడు బ‌న్నీ వాసు క‌నుస‌న్న‌ల్లోనే న‌డుస్తాయి. గీతా ఆర్ట్స్-2 బేన‌ర్లో తెర‌కెక్కే చిన్న‌, మీడియం రేంజ్ సినిమాల‌కు నిర్మాత‌గా బ‌న్నీ వాసు పేరే ప‌డుతుంద‌న్న సంగ‌తి తెలిసిందే. ప్ర‌స్తుతం ఆయ‌న నిర్మాణంలో తెర‌కెక్కిన మోస్ట్ ఎలిజిబుల్ బ్యాచిల‌ర్ విడుద‌ల‌కు సిద్ధంగా ఉంది.