హీరో గారి ఫ్యాషన్ శ్రుతి మించింది

బాలీవుడ్లో చాలామంది స్టార్లు, సూపర్ స్టార్లు ఉన్నారు. కానీ ప్రస్తుత హీరోల్లో ఫ్యాషన్ ఐకాన్ ఎవరు అంటే మాత్రం అందరూ రణ్వీర్ సింగ్ వైపే చూపిస్తారు. ఏ బ్యాగ్రౌండ్ లేకుండా బాలీవుడ్లోకి అడుగు పెట్టి.. కెరీర్ ఆరంభంలోనే మంచి విజయాలందుకుని పెద్ద స్టార్‌గా ఎదిగిన అతను.. ఫ్యాషన్ విషయంలో మిగతా హీరోలను వెనక్కి నెట్టి ముందుకెళ్లిపోయాడు. టిపికల్ డ్రెస్సింగ్, మేకప్‌తో అతను చేసే ఫ్యాషన్ ఫొటో షూట్లు యువత దృష్టిని బాగా ఆకర్షిస్తుంటాయి.

కొంచెం డిఫరెంట్‌గా ఉండాలనుకునేవాళ్లంతా అతణ్ని ఫాలో అవుతుంటారు. ఐతే కొన్నిసార్లు కొత్తగా అనిపించినా.. మరి కొన్నిసార్లు మాత్రం రణ్వీర్ సింగ్ డ్రెస్సింగ్, మేకప్ అతిగా అనిపిస్తుంటాయి. ఫ్యాషన్ పేరుతో మరీ శ్రుతి మించిపోయి చూసే జనాలకు ఎబ్బెట్టుగా అనిపిస్తుంటుంది అతడి అవతారం. తాజాగా అతను చేసిన ఫొటో షూట్ ఆ కోవకే చెందుతుంది.

ప్రముఖ ఇటాలియన్ ఫ్యాషన్‌ డిజైనర్‌ అలెశాండ్రో మిచెల్‌ను ప్రేరణగా తీసుకుని అతడి తరహాలో డ్రెస్సింగ్, హెయిర్‌స్టైల్‌తో కనిపించిన రణ్‌వీర్‌ను చూసి అందరూ అవాక్కవుతున్నారు. ఆ డ్రెస్సింగ్, హేర్ స్టైల్, గడ్డం మరీ ఆడ్‌గా ఉండి ఇదేం ఫ్యాషన్ అంటూ జనాలు జుట్టు పీక్కునేలా చేస్తోంది. కొత్తదనం పేరుతో మరీ ఇంత శ్రుతి మించాలా అంటూ రణ్వీర్ మీద కౌంటర్లు వేస్తున్నారు నెటిజన్లు. ఐతే రణ్వీర్ సింగ్ ఇలాంటి కామెంట్లను పట్టించుకునే రకం కాదు.

కొంచెం గ్యాప్ ఇచ్చి మళ్లీ ఇలాంటి చిత్రమైన అవతారాలతో పలకరించడం అతడికి మామూలే. కెరీర్ విషయానికి వస్తే రెండేళ్ల కిందట ‘టెంపర్’ రీమేక్ ‘సింబా’తో అతను భారీ విజయాన్నందుకున్నాడు. ఆ తర్వాత కపిల్ దేవ్ జీవిత కథ ఆధారంగా తెరకెక్కిన ‘83’లో నటించాడు. ఏడాది ముందే విడుదల కావాల్సిన ఈ చిత్రం కరోనా కారణంగా వాయిదా పడుతూ వస్తోంది. త్వరలోనే ‘83’ ప్రేక్షకుల ముందుకు వచ్చే అవకాశముంది.