ఎఫ్‌-3లో ఇంకో హీరోయిన్

టాలీవుడ్ కామెడీ సినిమాల్లో బిగ్గెస్ట్ హిట్‌గా నిలిచింది ‘ఎఫ్-2’. రెండేళ్ల కిందట సంక్రాంతికి విడుదలైన ఈ చిత్రం వినయ విధేయ రామ, యన్.టి.ఆర్-కథానాయకుడు లాంటి భారీ చిత్రాలను వెనక్కి నెట్టి ఎంత పెద్ద విజయాన్నందుకుందో తెలిసిందే. ఏకంగా రూ.80 కోట్ల షేర్‌తో ఆశ్చర్యపరిచిందీ చిత్రం. ఇప్పుడీ చిత్రానికి ‘ఎఫ్-3’ పేరుతో సీక్వెల్ తెరకెక్కుతున్న సంగతి తెలిసిందే.

‘ఎఫ్-2’లో ప్రధాన పాత్రలు పోషించిన విక్టరీ వెంకటేష్-తమన్నా, వరుణ్ తేజ్-మెహ్రీన్ ఇందులోనూ కొనసాగబోతున్నారు. ‘ఎఫ్-2’లో ఈ ఇద్దరు హీరోయిన్లు ఎంతగా గ్లామర్ విందు చేశారో తెలిసిందే. వీరికి తోడు అనసూయ భరద్వాజ్ ఒక పాట, కొన్ని సన్నివేశాల్లో మెరిసింది. సినిమాకు మరింత గ్లామర్ యాడ్ చేసింది. ఇప్పుడు ‘ఎఫ్-3’లోనూ ఇలాగే అడిషనల్ గ్లామర్ ట్రీట్ ఇవ్వబోతున్నాడు దర్శకుడు అనిల్ రావిపూడి. ఈ చిత్రం కోసం అతను మరో హీరోయిన్ని తీసుకున్నాడు.

తెలుగులో నందమూరి బాలకృష్ణ చిత్రాలు ‘లెజెండ్’, ‘రూలర్’లతో పాటు ‘పండగ చేస్కో’ లాంటి సినిమాల్లో నటించిన బాలీవుడ్ హాట్ హీరోయిన్ సోనాల్ చౌహాన్ ‘ఎఫ్-3’లో మూడో హీరోయిన్‌గా నటిస్తోంది. ఆమెతో ఫుల్ గ్లామరస్ రోల్ అని అంటున్నారు. ‘ఎఫ్-3’ లాంటి క్రేజీ సినిమాలో నటించడానికి ప్రస్తుతం ఫాంలో ఉన్న ఏ హీరోయిన్ అయినా సై అంటుంది. అలాంటిది ‘రూలర్’ తర్వాత కనిపించకుండా పోయిన సోనాల్‌ను ఈ సినిమా కోసం తీసుకోవడం కొంత ఆశ్చర్యం కలిగించే విషయమే. ఐతే ఆమెకే ఈ రోల్ ఇవ్వడానికి కారణమేంటో తెర మీదే చూసి తెలుసుకోవాలి.

ఇప్పటికే 60 శాతానికి పైగా ‘ఎఫ్-3’ చిత్రీకరణ పూర్తయింది. మే-జూన్ మధ్య సినిమా షూటింగ్ అంతా అవగొట్టాలని చూస్తున్నారు. ఆగస్టు 27న ఈ చిత్రం ప్రేక్షకుల ముందుకు రానున్న సంగతి తెలిసిందే. ‘ఎఫ్-2’ను నిర్మించిన దిల్ రాజు నిర్మాణంలోనే ఈ సినిమా కూడా తెరకెక్కబోతోంది.