సాయిప‌ల్ల‌వా మ‌జాకా

అప్పుడ‌ప్పుడూ కొన్ని పాట‌ల‌కు అనూహ్య‌మైన క్రేజ్ వ‌స్తుంటుంది. అవి అంచ‌నాల‌ను మించి హిట్ట‌యిపోతుంటాయి. సోష‌ల్ మీడియాను హోరెత్తించేస్తుంటాయి. ఐతే పాట బ‌య‌టికి వ‌చ్చాక జ‌నాలు విని మెచ్చాక అవి హిట్ట‌వుతుంటాయి. కానీ ఒక పాట విడుద‌ల కావ‌డానికి ముందే అది సంచ‌ల‌నం రేపుతుంద‌న్న అంచ‌నాలు క‌ల‌గ‌డం.. ఆ సాంగ్ ఇలా రిలీజ‌యిందో లేదో.. అన్ని సోష‌ల్ మీడియా ప్లాట్ ఫామ్స్‌లో మోత మోగిపోవ‌డం.. రికార్డుల మోత మోగిస్తూ దూసుకెళ్ల‌డం అరుదైన విష‌య‌మే.

ల‌వ్ స్టోరి సినిమాలోని సారంగ ద‌రియా పాట విష‌యంలో ఇదే జ‌రిగింది. ఈ పాట‌ను రిలీజ్ చేయ‌డానికి ముందే సాంగ్ ఆఫ్ ద ఇయ‌ర్ అంటూ చిత్ర బృందం ప్ర‌మోష‌న్ మొద‌లుపెట్టింది. సాయిప‌ల్ల‌వి ముఖ‌చిత్రంతో ఆ పాట పోస్ట‌ర్ వ‌దిలిన‌పుడే ఇది వ‌చ్చిండే మెల్ల మెల్ల‌గ వ‌చ్చిండే త‌ర‌హాలో పెద్ద హిట్ట‌వుతుంద‌న్న అంచ‌నాలు ఏర్ప‌డ్డాయి. సాయిప‌ల్ల‌వి ఈ పాట‌లో మెస్మ‌రైజ్ చేస్తుంద‌నే అభిప్రాయం క‌లిగింది.

ఇక పాట రిలీజ‌య్యాక ఏం జ‌రిగిందో అంద‌రికీ తెలిసిందే. త‌న‌పై పెట్టుకున్న అంచ‌నాల‌కు ఏమాత్రం త‌గ్గ‌ని రీతిలో సాయిప‌ల్ల‌వి త‌న‌దైన హావ‌భావాల‌తో, అదిరిపోయే స్టెప్లుల‌తో వారెవా అనిపించింది. దీంతో సారంగ ద‌రియా పాట‌కు యూట్యూబ్‌లో ఎదురే ఉండట్లేదు. మిలియ‌న్లకు మిలియ‌న్లు వ్యూస్‌, ల‌క్ష‌ల్లో లైక్స్‌తో దూసుకెళ్లిపోతోంది. సామ‌జ‌వ‌ర‌గ‌మ‌న‌, బుట్ట‌బొమ్మా లాంటి పాట‌ల రికార్డుల‌ను ఇది బ‌ద్ద‌లు కొట్టేసింది.

టాలీవుడ్లో అత్యంత వేగంగా 50 మిలియ‌న్ వ్యూస్ తెచ్చుకున్న పాట‌గా సారంగ ద‌రియా నిలిచింది. ఫిబ్ర‌వ‌రి 28న రిలీజైన ఈ పాట‌.. 15 రోజుల్లోనే ఈ మైలురాయిని చేరుకోవ‌డం విశేషం. ఈ పాట 100 మిలియ‌న్ వ్యూస్ తెచ్చుకోవ‌డం కూడా లాంఛ‌న‌మే. అది కూడా ఫాస్టెస్ట్ రికార్డే అవ్వ‌డానికి పుష్క‌లంగా అవ‌కాశాలున్నాయి. ఏప్రిల్ 16న ఈ సినిమా రిలీజ‌య్యాక ఈ పాట రీచ్ ఇంకా పెరుగుతుంద‌నే అంచ‌నాలున్నాయి.