దృశ్యం-3 కూడా ఉంటుందా?

మ‌ల‌యాళ సూప‌ర్ హిట్ మూవీ దృశ్యంకు సీక్వెల్‌గా వ‌చ్చిన దృశ్యం-2: ది రిసెంప్ష‌న్ అమేజాన్ ప్రైమ్‌లో నేరుగా విడుద‌లై అదిరిపోయే టాక్‌తో దూసుకెళ్తున్న సంగతి తెలిసిందే. ఇండియాలో వ‌చ్చిన ఉత్త‌మ సీక్వెల్స్‌లో ఒక‌టిగా దీన్ని చెబుతున్నారు విశ్లేష‌కులు. సినిమా చూసి వాళ్లు ఈ మాట‌తో క‌చ్చితంగా ఏకీభ‌విస్తారు. ఐతే ఈ సినిమాకు సీక్వెల్ వ‌స్తుంద‌ని గ‌త ఏడాది మ‌ధ్య వ‌ర‌కు ఎవ‌రూ ఊహించ‌లేదు. దృశ్యం వ‌చ్చాక ఐదేళ్లలో ఎప్పుడూ కూడా ఆ చ‌ర్చే లేదు. కానీ గ‌త ఏడాది క‌రోనా విరామం త‌ర్వాత జీతు జోసెఫ్‌-మోహ‌న్ లాల్ హ‌ఠాత్తుగా సినిమాను మొద‌లుపెట్టారు. శర‌వేగంగా పూర్తి చేశారు.

గ‌త శుక్ర‌వారం పెద్ద‌గా అంచ‌నాల్లేకుండా విడుద‌లైన ఈ చిత్రం మంచి టాక్ తెచ్చుకుంది. త్వ‌ర‌లోనే ఈ చిత్ర తెలుగు వెర్ష‌న్ కూడా సెట్స్ మీదికి వెళ్ల‌బోతోంది. ఐతే దృశ్యం-2 చూసిన వాళ్ల‌కు ఈ క‌థ‌కు కొన‌సాగింపుగా మూడో సినిమా కూడా వ‌స్తుందేమో అన్న సందేహాలు త‌లెత్తాయి. ఈ క‌థ‌లో ఆ స్కోప్ లేకుండా ఏమీ లేదు.

ఇదే విష‌యంపై ద‌ర్శ‌కుడు జీతు జోసెఫ్‌ను ఓ ఇంట‌ర్వ్యూలో ప్ర‌శ్నిస్తే ఆస‌క్తిక‌ర స‌మాధానం ఇచ్చాడు. ప్ర‌స్తుతానికైతే దృశ్యం-3 తీసే ఆలోచ‌న త‌న‌కు లేద‌న్నాడు. కానీ భ‌విష్య‌త్తులో ఏం జ‌రుగుతుందో చెప్ప‌లేమ‌న్నాడు. ఏదైనా లైన్ దొరికి ఈ క‌థ‌ను కొన‌సాగించ‌వ‌చ్చు అనిపిస్తే సినిమా చేయొచ్చ‌న్నాడు. దృశ్యం సినిమా రిలీజైన‌పుడు అంద‌రూ దీనికి సీక్వెల్ ఉంటుందా అని అడిగార‌ని, తాను ఆ అవ‌కాశం లేద‌ని చెప్పాన‌ని.. కానీ గ‌త ఏడాది సీక్వెల్‌పై ఆలోచ‌న వ‌చ్చింద‌ని, సినిమా తీశామ‌ని.. ఈ చిత్రానికి ఇలాంటి స్పంద‌న వ‌స్తుంద‌ని అస‌లు ఊహించ‌లేద‌ని జీతు చెప్పాడు.

తెలుగులో వెంక‌టేష్ హీరోగా దృశ్యం-2 చేస్తున్న విష‌యాన్ని ధ్రువీక‌రించిన జీతు.. మిగ‌తా భాష‌ల్లో రీమేక్ గురించి ప్ర‌స్తుతానికి ఏ నిర్ణ‌యం తీసుకోలేద‌ని చెప్పాడు. తెలుగులో ఈ సినిమాను థియేట‌ర్ల ద్వారా రిలీజ్ చేస్తాం కాబ‌ట్టి మంచి రీచ్ ఉంటుంద‌ని ఆశిస్తున్న‌ట్లు జీతు తెలిపాడు.