2.0 నిర్మాతల చేతికి ‘ఆర్ఆర్ఆర్’

‘బాహుబలి’కి దేశవ్యాప్తంగా అంతటి ఆదరణ లభిస్తుందని, వివిధ భాషల వాళ్లు ఈ సినిమాను చూసి అంతగా ఊగిపోతారని.. ఆ చిత్రం మొదలైనపుడు ఎవ్వరూ ఊహించి ఉండరు. దానికి అన్నీ కలిసొచ్చి ఒక మ్యాజిక్ జరిగిపోయింది. మళ్లీ రాజమౌళి తలుచుకున్నా ఇలాంటి మ్యాజిక్‌ను రిపీట్ చేయలేడని, మరో సినిమాకు ఇంత క్రేజ్ తీసుకురాలేడని అంతా అనుకున్నారు. కానీ జక్కన్న కొత్త సినిమా ‘ఆర్ఆర్ఆర్’కు సైతం క్రేజ్ తక్కువగా ఏమీ లేదు.

సినిమా ఎలా ఉంటుంది.. ‘బాహుబలి’ని మ్యాచ్ చేస్తుందా లేదా.. రాజమౌళి తనపై పెట్టుకున్న అంచనాలను అందుకుంటాడా లేదా అన్నది పక్కన పెడితే.. ప్రి రిలీజ్ బిజినెస్‌లో మాత్రం ‘ఆర్ఆర్ఆర్’.. ‘బాహుబలి’కి తక్కువగా ఏమీ నిలిచేలా లేదు. ఈ చిత్రానికి తెలుగులోనే కాక వివిధ భాషల నుంచి భారీ బిజినెస్ ఆఫర్లే వస్తున్నట్లు తెలుస్తోంది. రామ్ చరణ్, జూనియర్ ఎన్టీఆర్ తమిళ ప్రేక్షకులకు పెద్దగా పరిచయం లేకపోయినా సరే.. కేవలం రాజమౌళి పేరు చూసి ‘ఆర్ఆర్ఆర్’కు తమిళంలో కళ్లు చెదిరే బిజినెస్ ఆఫర్ వచ్చినట్లు సమాచారం.

ఇండియన్ ఫిలిం హిస్టరీలోనే అత్యధిక బడ్జెట్‌తో ‘2.0’ చిత్రాన్ని నిర్మించిన లైకా ప్రొడక్షన్స్ సంస్థ ‘ఆర్ఆర్ఆర్’ తమిళ వెర్షన్ హక్కులు సొంతం చేసుకున్నట్లు సమాచారం. అందుకోసం ఏకంగా రూ.45 కోట్లు వెచ్చించిందట ఆ సంస్థ. ఇది దగ్గర దగ్గర ‘బాహుబలి: ది కంక్లూజన్’ రేటుకు సమానం. ‘బాహుబలి: ది బిగినింగ్’ తర్వాత ‘ది కంక్లూజన్’కు తమిళంలో కూడా ఎంత క్రేజ్ వచ్చిందో తెలిసిందే. కానీ ‘ఆర్ఆర్ఆర్’లో ఇప్పటి వరకు చూస్తే తమిళ ప్రేక్షకులకు కనెక్ట్ అయ్యేు అంశాలు తక్కువే. రాజమౌళి అనే పేరు తప్ప వారిని ఆకర్షించే అంశాలు పెద్దగా కనిపించడం లేదు.

అయినా సరే.. ఈ చిత్రానికి ఈ రేటు దక్కిందంటే ఆశ్చర్యమే. పబ్లిసిటీ, ఇతర ఖర్చులు కలిపితే ఈ చిత్రానికి తమిళంలో రూ.50 కోట్ల షేర్ వస్తేనే బ్రేక్ ఈవెన్ అన్నమాట. అది పెద్ద టాస్కే. మరి జక్కన్న ఈ టాస్క్‌ను ఎలా ఛేదిస్తాడో చూడాలి. లైకా వాళ్ల బేనర్ మీద రిలీజ్ అంటే హడావుడి మామూలుగా ఉండదు. వాళ్ల పబ్లిసిటీనే వేరుగా ఉంటుంది. దసరా కానుకగా అక్టోబరు 13న ఈ చిత్రం విడుదల కానున్న సంగతి తెలిసిందే.