లైలా ఎందుకు తీశావ్ విశ్వక్ అన్నా

ప్రతి హీరో కెరీర్లో ఫ్లాపులు ఉంటాయి. కానీ కొన్ని సినిమాలు మాత్రం ఆ పేర్లు తలుచుకోవడానికి కూడా భయపడే రేంజిలో డిజాస్టర్లు అవుతుంటాయి. ట్రోల్ మెటీరియల్స్‌గా మారి ఆ హీరోలకు అవమాన భారాన్ని మిగులుస్తాయి. యువ కథానాయకుడు విశ్వక్సేన్ కెరీర్లో ‘లైలా’ అలాంటి సినిమానే. రాజేంద్ర ప్రసాద్ చేసిన ‘మేడమ్’ తరహా హీరో అమ్మాయి అవతారం ఎత్తే సినిమా ఇది.

కానీ ఈ కథను చాలా పేలవంగా డీల్ చేయడంతో సినిమా ప్రేక్షకులకు చుక్కలు చూపించింది. బాక్సాఫీస్ దగ్గర పెద్ద డిజాస్టర్‌గా నిలవడమే కాక.. సోషల్ మీడియాలో విశ్వక్ మీద బాగా ట్రోలింగ్‌కు దారి తీసింది. అందుకే విశ్వక్ ఈ సినిమాను రిలీజ్ తర్వాత ప్రమోట్ చేయలేదు. ఆ తర్వాత కూడా దీని గురించి ఎక్కడా ప్రస్తావించలేదు. ఐతే తన కొత్త చిత్రం ‘కల్ట్’ ట్రైలర్ లాంచ్ సందర్భంగా ఒక అభిమాని ‘లైలా’ ప్రస్తావన తెచ్చాడు.

స్టేజ్ మీద విశ్వక్ మాట్లాడుతుండగా.. ‘‘లైలా సినిమా ఎందుకు తీశావన్నా’’ అంటూ గట్టిగా అరిచాడు. ముందు ఏం సమాధానం చెప్పాలో తెలియనట్లు నవ్వేసిన విశ్వక్.. తర్వాత ‘‘లైలా తీశాకే ఇది తీయబుద్ధేసిందిరా’’ అని బదులిచ్చాడు. ‘కల్ట్’ విశ్వక్ సొంత స్క్రిప్టు, స్వీయ దర్శకత్వంలో రూపొందిన సినిమా కావడం విశేషం. ఇండియాలో ఇప్పటిదాకా ఎవ్వరూ తీయని ‘శ్లాషర్’ జానర్లో తెరకెక్కిన సినిమాగా దీన్ని టీం ప్రమోట్ చేస్తోంది.

ఈసారి డిఫరెంట్ జానర్లోకి అడుగుపెట్టడం గురించి విశ్వక్ స్పందిస్తూ.. తాను ప్రయోగాలు చేసినపుడు ప్రేక్షకులు బాగా ఆదరించారని.. అలా కాకుండా ప్రేక్షకులకు ఇది నచ్చుతుందేమో అని కమర్షియల్ సినిమాలు చేసినపుడు మాత్రం అవి ఫెయిలయ్యాయని చెప్పాడు. దీన్ని బట్టి తనకు అర్థమైందేంటంటే.. ప్రయోగాత్మక చిత్రాలే తనకు కమర్షియల్ సినిమాల మాదిరి అని.. కాబట్టి ఇక నుంచి ప్రయోగాలే చేస్తూ ముందుకు వెళ్తానని విశ్వక్ స్పష్టం చేశాడు. ‘కల్ట్’కు ప్రముఖ దర్శకుడు తరుణ్ భాస్కర్ మాటలు అందించడం విశేషం. ఈ నెల 30న ఈ చిత్రం ప్రేక్షకుల ముందుకు రానుంది.