కొత్త మార్కెట్ తెరిచిన కలీన్ భయ్యా

ఒక వెబ్ సిరీస్ సినిమాగా మారిస్తే ప్రేక్షకుల్లో ఆసక్తి ఉంటుందానే అనుమానం  మిర్జాపూర్ అనౌన్స్ మెంట్ వచ్చినప్పుడు అందరికీ కలిగింది. అందులోనూ మూడు సీజన్లు పూర్తి చేసుకున్న ఈ బ్లాక్ బస్టర్ ని వెండితెర కోసం మూడు గంటల కంటెంట్ గా మార్చడం పెద్ద ఛాలెంజ్. పైగా కీలక పాత్రలు కొన్ని చనిపోయిన తర్వాత. అయితే టీమ్ దీన్ని సవాల్ గా తీసుకుని అవే క్యారెక్టర్లను తిరిగి బ్రతికించి పూర్తిగా కొత్త కథతో మిర్జాపూర్ ని సిల్వర్ స్క్రీన్ కోసం విజయవంతంగా కన్వర్ట్ చేసింది.

కట్ చేస్తే మిర్జాపూర్ ఊహించని ఓపెనింగ్ దక్కించుకుంది. రెండు రోజులకు సుమారు 70 కోట్లతో బోణీ చేశాక వీకెండ్ మరింత స్ట్రాంగ్ గా కనిపిస్తోంది. నిజానికి మిర్జాపూర్ మూవీకి యునానిమస్ రివ్యూలు రాలేదు. అయితే ఈ సిరీస్ ని విపరీతంగా ప్రేమించిన వాళ్లకు, కలీన్ భయ్యా – మున్నా – గుడ్డు పాత్రలను అభిమానించిన వాళ్ళను సంతృప్తి పరిచేలా ఉండటం వసూళ్లకు కలిసి వస్తోంది. కొత్తగా రవికిషన్ క్యారెక్టర్ జోడించి రెండు వర్గాల మధ్య గ్యాంగ్ స్టర్ డ్రామాగా కొత్త మలుపు తిప్పడం ఆకట్టుకుంది.

కథ పరంగా చూస్తే మరీ ఎగ్జైటింగ్ గా అనిపించదు. మిర్జాపూర్ నేర సామ్రాజ్యాన్ని తన చెప్పు చేతల్లో పెట్టుకున్న కలీన్ భయ్యాని పడగొట్టేందుకు సిఎం తమ్ముడు ఎక్కడో రాజస్థాన్ లో ఉన్న బబ్బన్ యాదవ్ ని రెచ్చగొడతాడు. ముందు వ్యాపారం పేరుతో స్నేహం మొదలుపెట్టిన బబ్బన్ ఆ తర్వాత కలీన్ గ్యాంగ్ ని తన స్థావరానికి వచ్చేలా చేసి చంపడానికి చూస్తాడు. ఆ తర్వాత జరిగే యుద్ధం, దానికి ముందు వెనుక జరిగిన పరిణామాలు ఈ మిర్జాపూర్ మూవీ.

వెబ్ సిరీస్ లో ఉన్నన్ని ట్విస్టులు, షాకింగ్ థ్రిల్స్ ఈ సినిమాలో అంతగా ఉండవు. నాలుగు పాత్రల మధ్య డ్రామాకు ప్రాధాన్యం ఇవ్వడంతో మలుపులకు ఎక్కువ అవకాశం లేకుండా పోయింది. క్లైమాక్స్ కొంచెం సాగదీసినట్టు అనిపించినా ఓవరాల్ గా నిరాశ పరచకుండా నడిపించడంలో దర్శకులు గుర్మీత్ సింగ్ సక్సెస్ అయ్యారు. అందులోనూ కాంపిటీషన్ వేరే చెప్పుకోదగ్గ సినిమాలు లేకపోవడం మిర్జాపూర్ కు బాగా కలిసి వస్తోంది. ఆదివారంతో వంద కోట్ల లాంఛనం జరిగిపోతుంది.