హడావిడి లేకుండా 100 కోట్లు లాగేసింది

చిన్న మూవీ, అందులోనూ కేవలం రెండు కోట్ల బడ్జెట్ తో తీశారు. పైగా డివోషనల్ బ్యాక్ గ్రౌండ్. ఎంత దేవుడి సినిమా అయినా జనం ప్రతిదాన్ని ఎగబడి చూసేంత సీన్ లేదిప్పుడు. అలాంటిది ప్యాన్ ఇండియా పోటీలను తట్టుకుని మరీ ఒక చిత్రం వంద కోట్లు సాధించిందంటే ఎవరికైనా ఆశ్చర్యం కలగక మానదు. గత నెల విడుదలైన బాలీవుడ్ మూవీ హనుమాన్ అంశ్ దానికి సాక్ష్యంగా నిలుస్తోంది. నెల తిరక్కుండానే 100 కోట్ల గ్రాస్ క్లబ్బులోకి అడుగు పెట్టడం చరిత్రగా నిలుస్తోంది.

ఆగస్ట్ 7 హనుమాన్ అంశ్ రిలీజైనప్పుడు జనంలో అసలు ఎలాంటి అంచనాలు లేవు. మొదటి రెండు మూడు రోజుల గ్రాస్ దేశవ్యాప్తంగా కేవలం లక్షల్లో ఉంది. అధిక శాతం సెంటర్లలో అసలు విడుదలే కాలేదు. వచ్చిన సంగతి కూడా జనాలకు తెలియనంత వీక్ గా ప్రమోషన్లు జరిగాయి. తర్వాత అద్భుతం జరిగిపోయింది. పబ్లిక్ టాక్, రివ్యూలు, సోషల్ మీడియా సపోర్ట్ అన్నీ అనుకూలంగా మారిపోవడంతో హనుమాన్ అంశ్ కు థియేటర్లు పెరిగి కలెక్షన్ ప్రవాహం మొదలైపోయింది.

ఇక అక్కడి నుంచి వెనుదిరిగి చూడాల్సిన అవసరం లేకపోయింది. టాక్సిక్ వచ్చినా మీర్జాపూర్ వచ్చినా వాటిని హనుమాన్ అంశ్ లెక్క చేయడం లేదు. నిత్యం బుక్ మై షో ట్రెండింగ్ లో ఉంటోంది. సుప్రసిద్ధ ఆధ్యాత్మిక గురువు లక్ష్మణ్ దాస్ / నీమ్ కరోలి బాబా జీవిత కథ ఆధారంగా రూపొందిన ఈ సినిమాకు డాక్టర్ విశాల్ చతుర్వేది దర్శకత్వం వహించారు. తక్కువ తారాగణంతో పేరున్న నటీనటులు లేకుండా పరిమిత బడ్జెట్ తో తీసిన హనుమాన్ అంశ్ ఇప్పుడు కనకవర్షం కురిపిస్తోంది.

అచ్చం మన ఇరుముడి లాగా ఇది ఎక్కడి దాకా వెళ్తుందో ఫైనల్ కలెక్షన్లు ఎక్కడ ఆగుతాయో ట్రేడ్ వర్గాలతో సహా ఎవరికి అంతు చిక్కడం లేదు. ఇక్కడ అర్థం చేసుకోవాల్సిన విషయం ఏంటంటే వందల కోట్లు పెట్టి రెండు భాషల్లో సమాంతరంగా తీసినంత మాత్రం పబ్లిక్ గుడ్డిగా చూస్తారనే గ్యారెంటీ లేదని టాక్సిక్ నిరూపించింది. సరైన కథా కథనాలతో కనెక్ట్ అయితే బడ్జెట్ తో సంబంధం లేకుండా జనం బ్రహ్మరథం పడతారని ఇరుముడి, హనుమాన్ అంశ్ బాక్సాఫీస్ సాక్షిగా నిరూపిస్తున్నాయి.