రెహమాన్ నిజంగా లైవ్ ఇస్తున్నారా

పెద్ది రీ రికార్డింగ్ ఎక్కడిదాకా వచ్చిందో ఇంకా క్లారిటీ లేదు. అడుగుదామంటే దర్శకుడు బుచ్చిబాబు బయట కనిపించే పరిస్థితిలో లేరు. చెన్నైలో ఉన్నారని ఒకరు, హైదరాబాద్ లో ఉండి పోస్ట్ ప్రొడక్షన్ చివరి దశ పనులు చూసుకుంటున్నారని మరొకరి ఇలా రకరకాల వెర్షన్లు వినిపిస్తున్నారు. ముంబైలో పద్దెనిమిదో తేదీ ట్రైలర్ లాంచ్ జరగనుంది. భోపాల్ లో ఐటెం సాంగ్ విడుదల చేస్తారు. ఇందులోనే రెహమాన్ లైవ్ కన్సర్ట్ ఉంటుందనే ప్రచారం జోరుగా జరుగుతోంది.

నిజానికి రెహమాన్ ఈ పద్ధతికి వ్యతిరేకం కాదు. గతంలో ఎన్నో తమిళ సినిమాలకు స్టేజి మీద లైవ్ ఇచ్చారు. ధనుష్ రాయన్ కోసం ఇచ్చిన పెర్ఫార్మన్స్ వీడియోల రూపంలో చాలా వైరల్ అయ్యింది. ఆయన ప్రత్యక్షంగా మ్యూజిక్ చేస్తూ పాటలు పాడితే ఆ వైబ్ వేరేలా ఉంటుంది. అయితే రెహమాన్ కు అంత టైం ఉందానేది అందరి మదిలో మెదులుతున్న ప్రశ్న. లైవ్ అంటే ముందస్తుగా ప్రిపరేషన్లు చేసుకోవాలి. రిహార్సల్స్ అవసరం. చూస్తేనేమో పెద్ది రిలీజ్ కు ఇరవై రోజులే ఉంది.

ఇప్పుడు రెహమాన్ ప్రోగామ్ గురించి ఎక్కువ ప్రచారం చేసి తీరా ఏదైనా కారణాల వల్ల భోపాల్ లో అది నిర్వహించలేకపోతే నెగటివ్ అవుతుంది. కానీ ఆ సమస్య లేదు. బుచ్చిబాబు ఒక ఆంగ్ల మీడియాకు ఇచ్చిన ఇంటర్వ్యూలో ఉంటుందని స్పష్టంగా చెప్పేశారు కాబట్టి సందేహాలు అక్కర్లేదు. లైవ్ కన్సర్ట్ అంటే హ్యాపీనే. అందరూ ఎంజాయ్ చేస్తారు. జాతీయ స్థాయిలో కవరేజ్ వస్తుంది. మైలేజ్ కూడా పెరుగుతుంది. అభిమానులు కోరుకుంటున్నది ఇలాంటి మైలేజ్ ఇచ్చే ప్రమోషన్లే.

పెద్ది టీమ్ కాళ్ళకు విమానాలు కట్టుకుని పరుగులు పెడుతోంది. సోషల్ మీడియాలో ఫ్యాన్స్ పబ్లిసిటీ విషయంలో కొంత అసంతృప్తిగా ఉన్నా బెస్ట్ అవుట్ ఫుట్ కి పబ్లిసిటీ అవసరం లేదనే ధోరణి మేకర్స్ లో కనిపిస్తోంది. అలాని పెద్దిని లైట్ తీసుకోవడం లేదు. ట్రైలర్ లాంచ్ అయ్యాక నాన్ స్టాప్ గా రెండు వారాల పాటు ప్రచారం హోరెత్తిపోయేలా పలు కార్యక్రమాలు ప్లాన్ చేశారట. పిఠాపురంలో ప్రీ రిలీజ్ ఈవెంట్ చేసే ప్రతిపాదన ఉందట కానీ సాధ్యం కాకపోవచ్చని టాక్.