విజయ్ చెప్పింది ప్రాక్టికల్ గా సాధ్యమేనా?

రాజకీయ నేపథ్యంలో వచ్చిన సినిమాలలో కొన్ని సీన్లు చూడ్డానికి భలే ఉంటాయి. ఒకే ఒక్కడు, భరత్ అనే నేను వంటి చిత్రాలలో ముఖ్యమంత్రి హోదాలో కథానాయకుడు తీసుకునే నిర్ణయాలకు థియేటర్లో విజిల్స్ మోత మోగిపోతాయి. కానీ, రియల్ లైఫ్ లో మాత్రం సినిమాల్లో చూపించినంత ఈజీగా ముఖ్యమంత్రులు చేయడం ప్రాక్టికల్ గా సాధ్యం కాదు. అయితే, కథా నాయకుడి నుంచి మహా నాయకుడిగా ఎదిగిన టీవీకే అధినేత, తమిళనాడు ముఖ్యమంత్రి విజయ్ మాత్రం రీల్ లైఫ్ మాదిరిగా రియల్ లైఫ్ లో తీసుకుంటున్న కొన్ని నిర్ణయాలు ఇప్పుడు ట్రెండింగ్ లో ఉన్నాయి.

అంతేకాదు, తమ పార్టీ నేతలు గీత దాటితే వేటు తప్పదని విజయ్ కరాఖండిగా చెప్పేశారు. బడి, గుడికి 500 మీటర్ల దూరంలో ఉన్న మద్యం షాపులు తీసివేయాలని సంచలన ఆదేశాలు జారీ చేసిన విజయ్…తాజాగా తన పార్టీ ఎమ్మెల్యేలకూ కొన్ని నిబంధనలు పెట్టారు. బహిరంగ ప్రదేశాల్లో బ్యానర్లు, ఫ్లెక్సీలు ఏర్పాటు చేయకూడదని హుకుం జారీ చేశారు. ప్రజలకు, ట్రాఫిక్‌కు అంతరాయం కలిగిస్తే కఠిన చర్యలు తప్పవని వార్నింగ్ ఇచ్చారు.

అంతేకాదు, పుట్టినరోజు వేడుకలు, శుభకార్యాల పేరుతో ఆర్భాటాలు చేయవద్దని సూచించారు. నిబంధనలు ఉల్లంఘించే కార్యకర్తలపై పార్టీ పరంగా క్రమశిక్షణ చర్యలు తప్పవని అన్నారు. ప్రజా సంక్షేమమే పరమావధిగా పనిచేయాలని టీవీకే ప్రధాన కార్యదర్శి ఎన్. ఆనంద్ ఒక ప్రకటన విడుదల చేశారు.

అయితే, పార్టీ అధికారంలోకి వచ్చిన కొత్తలో, ప్రభుత్వం ఏర్పాటు చేసిన జోష్ లో కొత్త నిర్ణయాలు తీసుకోవడం, మార్పు తీసుకురావాలని అనుకోవడం సహజం. అయితే, కాలక్రమంలో ఆ నిర్ణయాలు ఎంతవరకు అమలు చేస్తారు, ఆ నేతలు ఏ మేరకు పాటిస్తారు అన్నది మిలియన్ డాలర్ల ప్రశ్న.