ఉస్తాద్ పరిచయం… మాస్ ప్రేక్షకులే లక్ష్యం

పవన్ కళ్యాణ్ కెరీర్ లోనే కాదు గత కొన్నేళ్లలో చెప్పిన డేట్ కన్నా వారం ముందు వస్తున్న స్టార్ హీరో సినిమాగా ఉస్తాద్ భగత్ సింగ్ మీద అభిమానులకు బోలెడు అంచనాలున్నాయి. హరీష్ శంకర్ ట్రాక్ రికార్డు ఎలా ఉన్నా గబ్బర్ సింగ్ కాంబినేషన్ కావడంతో మరోసారి మేజిక్ రిపీట్ అవుతుందనే నమ్మకంతో మార్చి 19 కోసం ఎదురు చూస్తున్నారు.

ట్రైలర్ కు ముందు చిన్న శాంపిల్ రూపంలో 45 సెకండ్ల వీడియోని విడుదల చేశారు. ఇందులో పవన్ స్వాగ్, స్టయిల్ పరిచయం చేస్తూ అసలు కంటెంట్ ఎలా ఉండబోతోందో కొన్ని క్లూస్ ఇచ్చారు. కౌబాయ్ గెటప్ టైపులో ఉన్న కాస్ట్యూమ్ తో ఆయుధం పట్టుకుని భగత్ సింగ్ పోలీస్ స్టేషన్ లోకి రావడం, ఇది భగవత్గీత కాదు భగత్ గీత దమ్ముంటే దాటండి అంటూ వార్నింగ్ ఇవ్వడం పూర్తిగా ఫ్యాన్ స్టఫ్ లా ఉంది.

పంచెకట్టు వేసుకుని రౌడీలతో తలపడే షాట్, గుర్రం మీద సన్నివేశం బోనస్ గా పొందుపరిచారు. ఇది కేవలం ట్రైలర్ కు టీజర్ కాబట్టి ఇంతకన్నా దీన్ని డీ కోడ్ చేయలేము కానీ మొత్తానికి హరీష్ శంకర్ చెప్పినట్టు ఉస్తాద్ భగత్ సింగ్ పూర్తిగా మాస్ మెటీరియల్ తో ఫ్యాన్స్ తో విజిల్స్ వేయించే సరుకుతో ఉగాది పండక్కు వస్తోంది. ఓజి తర్వాత పవన్ నుంచి వస్తున్న మూవీ ఇదే కావడంతో హైప్ పరంగా రిలీజ్ నాటికి ఆకాశమే హద్దుగా ఉంటుందని బయ్యర్ వర్గాలు ఆశిస్తున్నాయి.

ఓజి గ్యాంగ్ స్టర్ డ్రామా కాబట్టి మాస్ వర్గాలకు పూర్తి స్థాయిలో చేరలేదు. అయినా మూడు వందల కోట్లు కొల్లగొట్టింది. ఉస్తాద్ భగత్ సింగ్ ప్రాపర్ మాస్ మసాలాలున్న మూవీ. సో టార్గెట్ ఏంటో అర్థం చేసుకోవచ్చు. బ్యాక్ గ్రౌండ్ స్కోర్ తమన్ కి ఇవ్వడంతో ఆ ముద్ర అయితే కనిపిస్తోంది. దురంధర్ ది రివెంజ్ రూపంలో భారీ పోటీని ఎదురుకోబోతున్న ఉస్తాద్ భగత్ సింగ్ దానికి ధీటుగా ఉంటుందా అనేది ఫుల్ ట్రైలర్ వచ్చాక క్లారిటీ వస్తుంది. పవన్ కళ్యాణ్ ఫ్యాన్స్ అయితే ఆ క్షణం కోసమే ఎదురు చూస్తున్నారు.