అల్లు అర్జున్‌కు ఆ ఇద్దరి క్షమాపణ

కొన్ని రోజుల కిందట బాలీవుడ్ మార్కెటింగ్ స్ట్రాటజిస్ట్ కావేరి బరువా.. టాలీవుడ్ స్టార్ హీరో అల్లు అర్జున్ గురించి చేసిన వ్యాఖ్యలు ఎంత దుమారం రేపాయో తెలిసిందే. అల్లు అర్జున్‌ను కలవబోతే.. ఆయన కళ్లలోకి కళ్లు పెట్టి చూడకూడదు, సార్ అనే పిలవాలి, షేక్ హ్యాండ్ ఇవ్వకూడదు.. అంటూ ‘డూస్ అండ్ డోంట్స్’తో 42 పాయింట్లు ఇచ్చారంటూ ఆమె చేసిన వ్యాఖ్యలపై బన్నీ టీం తీవ్రంగా స్పందించింది.

ఈ వ్యాఖ్యలను ఖండించడమే కాక.. కావేరి మీద, తనతో పాడ్ కాస్ట్ చేసిన స్వీకృతి మీద న్యాయపరమైన చర్యలకు కూడా సిద్ధమైంది. వీళ్లిద్దరి మీద అల్లు అర్జున్ అభిమానులు సోషల్ మీడియాలో గట్టిగానే దాడి చేశారు. మరోవైపు కావేరి వ్యాఖ్యలను అందిపుచ్చుకున్న బన్నీ యాంటీ ఫ్యాన్స్.. అతణ్ని సోషల్ మీడియాలో విపరీతంగా ట్రోల్ చేశారు. ఇలా ఒక వారం పాటు వ్యవహారం నాని.. తర్వాత సద్దుమణిగింది.

కాగా ఇప్పుడు కావేరి, స్వీకృతి.. అల్లు అర్జున్‌కు బేషరతుగా క్షమాపణ చెబుతూ ప్రెస్ నోట్స్ రిలీజ్ చేశారు. సరిగా వెరిఫై చేసుకోకుండా అల్లు అర్జున్ మీద ఆ వ్యాఖ్యలు చేశానని.. వాటి పట్ల చింతిస్తున్నానని.. ఆ కామెంట్స్ వెనక్కి తీసుకుంటున్నానని కావేరి స్పష్టం చేశారు. .. తాను మాటల ఫ్లోలో ఆ వ్యాఖ్యలు చేశానన్నారు. అంతే తప్ప తనకు వేరే ఉద్దేశాలేమీ లేవని ఆమె పేర్కొన్నారు.

డూస్ అండ్ డోంట్స్ అంటూ 42 పాయింట్లతో ఎవ్వరూ నోట్ తనకు ఇవ్వలేదని.. సోషల్ మీడియాలో ప్రచారంలో ఉన్న లిస్ట్ కూడా నిజమైంది కాదని ఆమె స్పష్టం చేసింది. బన్నీకి తాను మనస్ఫూర్తిగా క్షమాపణ చెబుతున్నట్లు పేర్కొన్న కావేరి.. ఆయన హార్డ్ వర్క్‌ను తాను ఎంతో గౌరవిస్తానని పేర్కొన్నారు.

మరోవైపు స్వీకృతి మాట్లాడుతూ.. అల్లు అర్జున్ మీద కావేరి వ్యాఖ్యలకు సంబంధించిన అన్ని వీడియోలు సోషల్ మీడియా నుంచి డెలీట్ చేశామన్న స్వీకృతి.. తాను కూడా బన్నీకి బేషరతుగా క్షమాపణ చెబుతున్నట్లు పేర్కొన్నారు. ఈ వ్యవహారాన్ని ఇంతటితో ముగించాలని ఆమె కోరారు.