అన్నగారికి కొత్త డేట్?

డిసెంబరు బాక్సాఫీస్‌కు వాయిదా నెలగా మారిపోయింది. ఈ నెలకు వివిధ భాషల్లో షెడ్యూల్ అయిన సినిమాలు ఒక్కొక్కటిగా వాయిదా పడడం చూస్తున్నాం. డిసెంబరు 5న రావాల్సిన ‘అఖండ-2’ వాయిదా పడి వారం ఆలస్యంగా వచ్చింది. 18న రావాల్సిన ‘ఎల్ఐకే’ సినిమా ఫిబ్రవరికి వెళ్లిపోయింది. ఇక 12న రిలీజ్‌కు రెడీ అయిన కార్తి సినిమా ‘వా వాత్తియార్’ (తెలుగులో అన్నగారు వస్తారు).. అఖండ-2 తరహాలోనే చివరి నిమిషంలో వాయిదా పడ్డ సంగతి తెలిసిందే. 

ఐతే అఖండ-2 నిర్మాతల్లా ‘అన్నగారు వస్తారు’ ప్రొడ్యూసర్ హడావుడి పడలేదు. ఫైనాన్స్ సమస్యను వెంటనే సెటిల్ చేయలేకపోయాడు. కొత్త రిలీజ్ డేట్‌కు సంబంధించి మేకర్స్ నుంచి ఇప్పటిదాకా ఏ ప్రకటనా రాలేదు. ఐతే కోలీవుడ్ నుంచి వస్తున్న సమాచారం ప్రకారం కార్తి సినిమాకు కొత్త రిలీజ్ డేట్ ఖరారైనట్లే తెలుస్తోంది.

అనుకున్న తేదీ కంటే రెండు వారాలు ఆలస్యంగా ‘వా వాత్తియార్’ను తమిళ, తెలుగు భాషల్లో రిలీజ్ చేయబోతున్నారట. ఈ చిత్రాన్ని క్రిస్మస్ రేసులో నిలబెట్టబోతున్నారు. డిసెంబరు 25న క్రిస్మస్ కాగా.. ముందు రోజే ఈ చిత్రాన్ని రిలీజ్ చేయనున్నారట. సుదీర్ఘ కాలంగా ఉన్న ఫైనాన్స్ వివాదానికి సంబంధించి సూర్య, కార్తిల కజిన్.. నిర్మాత జ్ఞానవేల్ రాజా రూ.21 కోట్ల మేర చెల్లించాల్సి ఉంది. కోర్టు బయటే ఈ గొడవను సెటిల్ చేసుకున్న జ్ఞానవేల్.. సినిమాను రిలీజ్‌కు రెడీ చేస్తున్నాడు. 

డిసెంబరు 24న సినిమా ‘వా వాత్తియార్’ వస్తుందని డిస్ట్రిబ్యూటర్లకు సమాచారం ఇచ్చాడట జ్ఞానవేల్. ‘సూదుకవ్వుం’ ఫేమ్ నలన్ కుమారస్వామి రూపొందించిన ఈ చిత్రంలో కార్తి సరసన కృతి శెట్టి నటించింది. కృతి ఇంకో రెండు తమిళ చిత్రాల్లో నటించగా.. ఇప్పటిదాకా కోలీవుడ్లో తన సినిమా ఏదీ రిలీజ్ కాలేదు. ‘ఎల్ఐకే’, ‘జీనీ’ చిత్రాలు కూడా వెనక్కి వెళ్లిపోగా.. ‘వా వాత్తియార్’ అయినా రిలీజైతే ఈ ఏడాది ఆమె డెబ్యూను చూడొచ్చు.