విడాకుల వార్తలు.. క్లారిటీ ఇచ్చిన నటి

2000 తర్వాత అటు తమిళంలో, ఇటు తెలుగులో ఎన్నో మిడ్ రేంజ్ సినిమాల్లో నటించి మంచి పాపులారిటీ సంపాదించిన హీరోయిన్ సంగీత. ‘ఖడ్గం’ సహా అనేక తెలుగు చిత్రాల్లో కథానాయికగా నటించిన ఆమె.. లీడ్ రోల్స్ తగ్గాక క్యారెక్టర్ రోల్స్‌లోకి మారింది. ఇప్పుడు కూడా తెలుగు, తమిళ భాషల్లో పలు చిత్రాల్లో నటిస్తోంది. ఇటీవల నైంటీస్ రీ యూనియన్ ఈవెంట్లో కూడా మెరిసన సంగీత.. ఇప్పుడు ఓ నెగెటివ్ న్యూస్‌తో వార్తల్లోకి వచ్చింది. ఆ న్యూస్ సంగీత వ్యక్తిగత జీవితానికి సంబంధించింది.

సంగీత తన భర్త క్రిష్ నుంచి విడిపోతున్నట్లుగా మీడియాలో జోరుగా ప్రచారం జరుగుతోంది. అందుక్కారణం.. సోషల్ మీడియాలో తన పేరు వెనుక ‘క్రిష్’ అన్న పేరును తొలగించేయడమేనట. సంగీత క్రిష్ కాస్తా ఉత్త సంగీతగా మారిపోయిందని.. ఇది ఆమె విడాకులు తీసుకుంటోందనడానికి సంకేతమని నెటిజన్లు చర్చించుకోవడం మొదులపెట్టారు. మీడియాలోనూ ఈ మేరకు వార్తలు మొదలయ్యాయి. ఐతే ఈ రూమర్లకు సంగీత వెంటనే చెక్ పెట్టేసింది.

తాను మొదట్నుంచి సోషల్ మీడియాలో తన పేరును సంగీతగానే పెట్టుకుంటున్నాని.. ఇప్పుడు కొత్తగా మార్పేమీ లేదని ఆమె స్పష్టం చేసింది. తన భర్తతో తాను చాలా సంతోషంగా ఉన్నానని.. తమ మధ్య ఏ ఇబ్బందీ లేదని.. తాము విడాకులు తీసుకుంటున్నట్లు జరుగుతున్న ప్రచారం అబద్ధమని ఆమె స్పష్టం చేసింది. క్రిష్ తమిళంలో పేరున్న గాయకుడు. అతణ్ని సంగీత 16 ఏళ్ల కిందట పెళ్లి చేసుకుంది. వీరికి ఇద్దరు పిల్లలు ఉన్నారు. సంగీత త్వరలోనే ‘పరదా’ అనే బహు భాషా చిత్రంలో ప్రేక్షకులకు ముందుకు రానుంది.