సినీ పితామహుడుగా జూనియర్ ఎన్టీఆర్ ?

ప్రస్తుతం వార్ 2, ప్రశాంత్ నీల్ సినిమా, దేవర 2లకు కమిట్ మెంట్ ఉన్న జూనియర్ ఎన్టీఆర్ ఆ తర్వాత ఒక షాకింగ్ బయోపిక్ చేసే అవకాశాలున్నాయంటూ ముంబై మీడియాలో వస్తున్న కథనాలు షాక్ ఇచ్చేలా ఉన్నాయి. వాటి ప్రకారం సినీ పితామహుడిగా పరిశ్రమగా కొనియాడే దాదాసాహెబ్ ఫాల్కే బయోపిక్ లో నటించేందుకు తారక్ సుముఖత వ్యక్తం చేసినట్టు చెబుతున్నారు. ఈ ప్రాజెక్టు వెనుక రాజమౌళి, కార్తికేయ, వరుణ్ గుప్తా (మ్యాక్స్ స్టూడియోస్) ప్రమేయం ఉందని అందులో పొందుపరిచారు. స్క్రిప్ట్ సిద్ధంగా ఉందని, వినగానే జూనియర్ ఎగ్జైట్ అయిపోయి అంగీకారం తెలిపాడని పేర్కొన్నారు.

అసలు దాదాసాహెబ్ ఫాల్కే జీవితం ఎంత గొప్పదైనా ఆయన జీవితంలోని డ్రామాని తారక్ లాంటి ప్యాన్ ఇండియా కమర్షియల్ స్టార్ తో వర్కౌట్ చేయించడం కష్టం. ఎందుకంటే మాస్ అంత సులభంగా కనెక్ట్ కారు. 1870 లో పుట్టిన ధుండిరాజ్ గోవింద్ ఫాల్కే భారతదేశపు మొదటి సినిమా రాజా హరిశ్చంద్రకు నిర్మాత కం దర్శకులు. ఇది 1913లో రిలీజయ్యింది. మొత్తం 95 ఫీచర్ ఫిలింస్ తీసిన ఘనతను ఆయన సొంతం చేసుకున్నారు. 1903లో ఆర్కియాలాజి డిపార్ట్ మెంట్ లో ఫోటోగ్రాఫర్ గా చేరాక ఫాల్కే జీవితం మలుపు తిరిగింది. 1910లో లైఫ్ అఫ్ క్రీస్ట్ చిత్రం చూశాక తాను సినిమా తీయాలని నిర్ణయించుకోవడం దేశ తలరాతను మార్చింది.

మొత్తం ఆస్తులు అమ్మి డబ్బులు పోగేసి సినిమా తీయడానికి అవసరమైన పరికరాలు పుస్తకాలు కొనేవారు. లండన్ వెళ్లి అయిదు పౌండ్లతో కెమెరా కొనుక్కుని వచ్చి ఒక షార్ట్ ఫిలిం తీసి స్నేహితుల దగ్గర తీసుకున్నది, తాకట్టు రూపంలో పోగేసింది మొత్తం కలిసి పది వేల రూపాయలతో నిర్మాత, దర్శకుడిగా కెరీర్ ప్రారంభించారు. నగలు అమ్మి డబ్బు ఇచ్చిన భార్య సరస్వతి బాయ్ ప్రోత్సాహం చాలా ఉంది. ఇంత గొప్ప మనిషి జీవితం చివరి దశలో డబ్బు లేకుండా గడిచిపోయింది. చనిపోవడానికి ఆరు సంవత్సరాల ముందు వరకు ఆయనకు స్వంత ఇల్లు లేదు. అదే ఇంట్లో అనారోగ్యంతో కన్ను మూశారు.

ఇక్కడ క్లుప్తంగా చెప్పడం జరిగింది కానీ దాదాసాహెబ్ ఫాల్కే జీవితం చాలా పెద్దది. మరి ఇలాంటి కంటెంట్ ఖచ్చితంగా ఇప్పటి తరానికి పరిచయం చేయాల్సిన అవసరం చాలా ఉంది. జూనియర్ ఎన్టీఆర్ సూటవుతాడు కూడా. మరి నిజంగా కార్యరూపం దాలిస్తే ప్రపంచ సినిమా గొప్పగా చెప్పుకునే క్లాసిక్ అవుతుంది. బాక్సాఫీస్ పరంగా అద్భుతాలు చేసినా చేయకపోయినా ఒక మహనీయుడి జీవితం శాశ్వతత్వం సంపాదించుకుంటుంది. అన్నట్టు సీనియర్ నరేష్ కొన్నేళ్ల క్రితం రఘుపతి వెంకయ్యనాయుడు బయోపిక్ చేశారు కానీ ఆడలేదు. కానీ తారక్ దాదాసాహెబ్ ఫాల్కే చేస్తే స్కేల్ మారిపోతుంది కాబట్టి నిజమవ్వాలనే ప్రతి మూవీ లవర్ ప్రఘాడ కోరిక.