‘హిట్-3’లో ఆ సీక్వెన్స్ గురించి చెబితే…

నేచురల్ స్టార్ నాని నుంచి ‘హిట్-3’ లాంటి వయొలెంట్ ఫిలిం వస్తుందని ఎవ్వరూ ఊహించలేదు. ఇందులో వయొలెన్స్ వేరే లెవెల్లో ఉంటుంది. ఇక బూతుల సంగతి చెప్పాల్సిన పని లేదు. ‘హిట్-3’ ట్రైలర్ చూసినపుడే చాలామంది నాని ఇలాంటి సినిమా చేయడమేంటి అని అన్నారు. తన క్లాస్ ఫ్యాన్స్ కొంతమేర ఈ సినిమాకు దూరమయ్యారు కూడా. నిజానికి నాని సైతం ‘హిట్-3’ స్క్రిప్టు గురించి చెప్పినపుడు కొంచెం కంగారు పడ్డాడట. దర్శకుడు శైలేష్ కొలను రాసిన కొన్ని సీక్వెన్సులు చూసి ఇంత డార్క్‌గా ఉన్నాయేంటి అని షాకయ్యాడట. అందులో 9 నెలల పసికందుకు సంబంధించిన సన్నివేశం కూడా ఒకటని శైలేష్ ఒక ఇంటర్వ్యూలో వెల్లడించాడు.

ఈ సీక్వెన్స్ గురించి నాని సహా అందరూ తన గురించి అదోలా అనుకున్నట్లు శైలేష్ తెలిపాడు. నానితో పాటు ఈ చిత్రంలో విలన్ పాత్ర చేసిన ప్రతీక్ బబ్బర్ సైతం.. తాను రాసిన ఆ సీక్వెన్స్ గురించి విన్నపుడు ‘‘నీకేదైనా సమస్య ఉందా’’ అని అడిగినట్లు శైలేష్ వెల్లడించాడు. తన భార్య సైతం ‘హిట్-3’ స్క్రిప్టు గురించి చెప్పినపుడు భయపడిందని అతను తెలిపాడు. ఐతే తనకూ 4 ఏళ్ల పాప ఉందని.. కానీ స్క్రిప్టు రాస్తున్నపుడు తాను ప్రపంచంలో ఏం జరుగుతోందో తెలుసుకునే రాస్తానని అతను చెప్పాడు.

నిజ జీవితంలో ఇంతకంటే ఘోరమైన ఘటనలు జరుగుతున్నాయని.. వాటి గురించి చదివి ఇన్‌స్పైర్ అయి స్క్రిప్టు రాస్తానని.. ‘హిట్-3’ తరహా కథలు రాసేటపుడు.. తాను ఎవరితోనూ మాట్లాడకుండా దూరంగా వెళ్లిపోయి ఆ పనిలోనే ఉంటానని శైలేష్ తెలిపాడు. ‘హిట్-3’ రీసెర్చ్‌లో భాగంగా ‘డార్క్ వెబ్’ గురించి చాలా తెలుసుకున్నానని.. తెలంగాణ పోలీసులు తనకు వాళ్ల దగ్గర్నుంచి అంతర్గత సమాచారం చాలానే ఇచ్చారని.. అందువల్లే ‘డార్క్ వెబ్’ గురించి సినిమాలో అంత బాగా చూపించగలిగానని శైలేష్ చెప్పాడు.