నాని ఎదుగుదల చూశారా?

బ్యాగ్రౌండ్ లేకుండా ఇండస్ట్రీలోకి అడుగు పెట్టి స్టార్ హీరోగా ఎదగడం అంత తేలికైన విషయం కాదు. ఎంతో ప్రతిభ ఉండాలి. కథల ఎంపికలో నైపుణ్యం ఉండాలి. దీంతో పాటుగా కొంచెం అదృష్టం కూడా తోడవ్వాలి. నాని కెరీర్లో ఇవన్నీ ఉండబట్టే స్టార్ హీరోగా నిలబడ్డాడు. ఇండస్ట్రీలో నిలకడగా విజయాలు అందుకుంటూ సినిమా సినిమాకూ రేంజ్ పెంటుకుంటున్న హీరోగా నాని పేరే ముందు వరుసలో చెప్పుకోవాలి. పదేళ్ల ముందు ‘భలే భలే మగాడివోయ్’తో 50 కోట్ల వసూళ్ల మార్కును అందుకుంటే అందరూ ఔరా అనుకున్నారు. కానీ ఇప్పుడు వంద కోట్ల వసూళ్లు కూడా నానికి తేలికైపోయింది.

రెండేళ్ల కిందట ‘దసరా’తో తొలిసారి అతను వంద కోట్ల మైలురాయిని అందుకున్నాడు. ఇప్పుడు ‘హిట్-3’తో మరోసారి ఆ మైల్‌స్టోన్‌ను అందుకోవడం లాంఛనమే కాబోతోంది. తొలి రోజు ఓపెనింగ్స్‌ను పరిశీలిస్తే నాని ఎదుగుదల స్పష్టంగా కనిపిస్తుంది. నాని కెరీర్లో ఓపెనింగ్స్ పరంగా ట్రేడ్ వర్గాలను ఎక్కువ ఆశ్చర్యపరిచిన సినిమా అంటే.. ‘ఎంసీఏ’ అనే చెప్పాలి. నేచురల్ స్టార్ కెరీర్లో తొలి పూర్తి స్థాయి మాస్ సినిమాగా కూడా దాన్నే చెప్పాలి. దానికి 2017లోనే రూ.15 కోట్ల మేర ఓపెనింగ్స్ వచ్చాయి. నాని రేంజ్‌ను ఒక్కసారిగా పెంచిన చిత్రమిది.

ఆ తర్వాత నుంచి తన సినిమాలకు 10 కోట్ల ఓపెనింగ్స్ కామన్ అయింది. ‘దసరా’ చిత్రం మాత్రం ఒకేసారి నానిని పెద్ద రేంజికి తీసుకెళ్లిపోయింది. ఆ చిత్రానికి ఏకంగా రూ.38 కోట్ల ఓపెనింగ్స్ వచ్చాయి. ఐతే తర్వాత క్లాస్ టచ్ ఉన్న హాయ్ నాన్న, సరిపోదా శనివారం చిత్రాలు చేయడంతో ఆ స్థాయి ఓపెనింగ్స్ రాలేదు. కానీ ఇప్పుడు ‘హిట్-3’లో హీరోయిజం వేరే లెవెల్లో ఉండడం, మాస్‌కు కనెక్ట్ కావడం, ప్రి రిలీజ్ హైప్ పీక్స్‌కు చేరుకోవడంతో ఓపెనింగ్స్ ఊహించని స్థాయిలో వచ్చాయి. ఏకంగా రూ.43 కోట్ల వసూళ్లతో సంచలనం రేపింది ‘హిట్-3’. ‘ది ప్యారడైజ్’కు ఇప్పటికే కావాల్సినంత హైప్ వచ్చిన నేపథ్యంలో రూ.50 కోట్ల ఓపెనింగ్ అన్నది నానికి ఈజీ టార్గెట్ అని చెప్పొచ్చు. ఇలా సినిమా సినిమాకూ నాని రేంజ్ పెరిగిపోతుండడం విశేషం.