తండ్రితో టైగర్….బాలయ్యతో జైలర్

కొన్ని అరుదైన కలయికలు తెరమీద అంత సులభంగా జరగవు. వాటి కోసం సంవత్సరాలు లేదా దశాబ్దాలు ఎదురు చూడాల్సి ఉంటుంది. అలాంటిదే నందమూరి బాలకృష్ణ, రజనీకాంత్ కాంబో. ఈ ఇద్దరూ కలిసి జైలర్ 2లో సందడి చేయడం ఖరారైనట్టే. చెన్నై వర్గాల నుంచి అందుతున్న సమాచారం మేరకు త్వరలోనే దీనికి సంబంధించిన షూట్ చేయబోతున్నారు. మొదటి భాగంలో శివరాజ్ కుమార్, మోహన్ లాల్ కు ఇచ్చిన ఎలివేషన్లు ఏ స్థాయిలో పేలాయో చూశాం. వాటిని మించిపోయేలా పవర్ ఫుల్ బ్లాక్ ఒకటి దర్శకుడు నెల్సన్ దిలీప్ కుమార్ సెట్ చేసినట్టు తెలుస్తోంది. ఇక్కడో ప్రత్యేకమైన విశేషం చెప్పుకోవాలి.

రజనీకాంత్ కెరీర్ ప్రారంభంలో స్వర్గీయ ఎన్టీఆర్ ‘టైగర్’లో నటించారు. ఇది 1979లో రిలీజయ్యింది. అమితాబ్ బచ్చన్ ఖూన్ పసినా రీమేక్ గా మంచి విజయం అందుకుంది. ఆ తర్వాత నాలుగు సంవత్సరాలకే ఎన్టీఆర్ రాజకీయ ప్రవేశం చేయడం, తెలుగుదేశం జయకేతనం ఎగరేయడంతో మళ్ళీ ఈ కలయిక సాధ్యపడలేదు. బాలకృష్ణతోనూ వెండితెర మీద రజినిని చూసే ఛాన్స్ ఫ్యాన్స్ కు దక్కలేదు. ఇప్పుడు ఇంత గ్యాప్ తర్వాత అన్నగారి వారసుడు బాలయ్యతో రజని చేతులు కలపడం అంటే స్పెషల్ మూమెంటే. వచ్చే ఏడాది విడుదలకు జైలర్ 2 రెడీ అవుతోంది. సంక్రాంతి ఆప్షన్ పరిశీలిస్తున్నారు.

ఇంకొక్క ఆసక్తికరమైన విషయం ఏంటంటే జైలర్ 2 తర్వాత నెల్సన్ దిలీప్ కుమార్ జూనియర్ ఎన్టీఆర్ తో ఒక మూవీ చేయబోతున్నాడు. ఇంకా అధికారిక ప్రకటన రాలేదు కానీ పలు సందర్భాల్లో నిర్మాణ సంస్థ ఇచ్చిన హింట్స్ దాదాపు ఖరారు చేసేశాయి. అంటే ముందు బాబాయ్ ని డైరెక్ట్ చేసి ఆ తర్వాత అబ్బాయిని దర్శకత్వం వహించే ఛాన్స్ నెల్సన్ కు దక్కబోతోంది. ఇంకా షూటింగ్ సగం కూడా కాకుండానే జైలర్ 2కి తెలుగు నుంచి భారీ బిజినెస్ ఆఫర్లు వస్తున్నాయట. యాభై కోట్ల నుంచి నెంబర్ మొదలవుతోందని అంటున్నారు. అయితే కూలి రిలీజయ్యాకే జైలర్ 2 వ్యాపార వ్యవహారాలు మొదలవుతాయి.