నాని.. ఈసారైనా బోర్డర్ దాటుతాడా?

స్టార్ ఇమేజ్ ఉన్న ప్రతి హీరో పాన్ ఇండియా రేంజికి ఎదిగిపోవాలనే ప్రయత్నిస్తున్నాడు ప్రస్తుతం. కొందరు హీరోలకు అనుకోకుండా కలిసి వచ్చి పాన్ ఇండియా స్థాయిలో ఫాలోయింగ్ సంపాదించేశారు. మిగతా హీరోలు కూడా వారిలా ఎదిగిపోవాలని ఎడతెగని ప్రయత్నాలు చేస్తూనే ఉన్నారు. ఆల్రెడీ తమిళంలో కాస్త ఫాలోయింగ్ ఉన్న నేచురల్ స్టార్.. కొన్నేళ్ల నుంచి తన చిత్రాలకు పాన్ ఇండియా స్థాయిలో రీచ్ పెంచడానికి పయత్నిస్తున్నాడు. దసరా, హాయ్ నాన్న, సరిపోదా శనివారం.. ఈ చిత్రాలన్నీ బహు భాషల్లో ప్రకటించినవే. కానీ రిలీజ్ టైం దగ్గర పడేసరికి తెలుగులో మాత్రమే అవి ప్రభావం చూపాయి. ‘సరిపోదా శనివారం’ తమిళంలో ఓ మోస్తరుగా ఆడింది. మిగతా భాషల్లో రిలీజ్ నామమాత్రమే. కానీ నాని మాత్రం తన ప్రయత్నం ఆపట్లేదు.

తన కొత్త చిత్రం ‘హిట్-3’ని కూడా పాన్ ఇండియా స్థాయిలో రిలీజ్ చేయడానికి సన్నాహాలు చేసుకుంటున్నాడు. నాని కెరీర్లో హీరోయిజం, అలాగే వయొలెన్స్ పీక్స్‌లో ఉండబోతున్న సినిమాగా ‘హిట్-3’ కనిపిస్తోంది. హిట్ సిరీస్‌లో గత రెండు చిత్రాలూ ఓటీటీలో వివిధ భాషల ప్రేక్షకుల దృష్టిని ఆకర్షించాయి. నాని గత చిత్రాలు కూడా ఓటీటీలో ఇలాగే మంచి ఆదరణ పొందాయి. ఈ నేపథ్యంలో ‘హిట్-3’కి ఇతర భాషల్లో కూడా కొంత డిమాండ్ ఉన్నట్లే కనిపిస్తోంది.

నాని ఇతర భాషల్లోనూ సినిమాను కొంచెం గట్టిగా పుష్ చేసి, రిలీజ్ సరిగా ప్లాన్ చేస్తే ‘హిట్-3’ పాన్ ఇండియా స్థాయిలో హిట్టయ్యే అవకాశముంది. ఈ సినిమా మీద నాని చాలా ధీమాగా ఉన్నాడు. హీరోయిజం వేరే లెవెల్లో ఉండే ఈ సినిమాతో తన స్టార్ ఇమేజ్‌ ఇంకా పెరుగుతుందని అతను నమ్మకంతో ఉన్నాడు. శైలేష్ కొలను దర్శకత్వంలో నాని స్వయంగా నిర్మించిన ఈ చిత్రం.. మే 1న విడుదల కాబోతోంది. నాని సరసన ‘కేజీఎఫ్’ ఫేమ్ శ్రీనిధి శెట్టి ఇందులో కథానాయికగా నటించింది. ఈ చిత్రం వంద కోట్లకు పైగా బిజినెస్ చేసినట్లు సమాచారం.