బాలయ్యతో హరీష్ శంకర్?

టాలీవుడ్లో ఒక సెన్సేషనల్ కాంబినేషన్‌కు రంగం సిద్ధమవుతున్నట్లు ఒక హాట్ న్యూస్ ప్రచారంలోకి వచ్చింది. సీనియర్ హీరో నందమూరి బాలకృష్ణతో.. గబ్బర్ సింగ్ దర్శకుడు హరీష్ శంకర్ జట్టు కట్టబోతున్నాడన్నదే ఈ హాట్ న్యూస్. బాలయ్య-హరీష్ కాంబినేషన్లో సినిమాను అస్సలు ఊహించలేం. హరీష్ ఎక్కువగా యంగ్ హీరోలతోనే సినిమాలు చేశారు. బాలయ్య తరం సీనియర్లతో పని చేయలేదు. ఆయన ఎక్కువగా సినిమాలు చేసింది కూడా మెగా హీరోలతోనే. నందమూరి హీరోల్లో జూనియర్ ఎన్టీఆర్‌తో ‘రామయ్యా వస్తావయ్యా’ చేశాడు. కానీ అది డిజాస్టర్ అయింది.

హరీష్ సినిమాల శైలికి, బాలయ్య చిత్రాల స్టైల్‌‌కు తేడా ఉంటుంది. ఐతే గత కొన్నేళ్లలో బాలయ్య గోపీచంద్ మలినేని, అనిల్ రావిపూడి, బాబీ లాంటి హరీష్ సహచర యంగ్ డైరెక్టర్లతో సినిమాలు చేసి మంచి విజయాలందుకున్నారు. ఆయనకు వీళ్లు ఇమేజ్ మేకోవర్ ఇచ్చారు. ఈ క్రమంలోనే హరీష్ శంకర్ సైతం బాలయ్యతో సినిమాకు రెడీ అయినట్లు వార్తలు వస్తున్నాయి. పవన్ కళ్యాణ్‌తో చాలా ఏళ్ల కిందట హరీష్ శంకర్ దర్శకత్వంలో మొదలైన సినిమాకు ఎప్పటికప్పడు బ్రేకులు పడుతూనే ఉన్నాయి. ఒక కథ అనుకున్నాక దాన్ని మార్చి, ‘ఉస్తాద్ భగత్ సింగ్’ పేరుతో మరో సినిమా మొదలుపెట్టారు. అది కూడా ముందుకు కదల్లేదు.

అది హోల్డ్‌లో పడిపోవడంతో ‘మిస్టర్ బచ్చన్’ చేశాడు హరీష్. కానీ అది డిజాస్టర్ అయింది. ‘ఉస్తాద్..’ ఇప్పుడిప్పుడే మొదలయ్యే సంకేతాలు కనిపించకపోవడంతో ఈలోపు మరో సినిమా చేయాలని హరీష్ డిసైడయ్యారు. రామ్‌తో సినిమా అన్నారు కానీ.. అది కార్యరూపం దాల్చలేదు. ఈలోపు వేరే భాషల్లో పెద్ద సినిమాలు తీస్తున్న కేవీఎన్ ప్రొడక్షన్స్ సంస్త.. బాలయ్య-హరీష్ కలయికలో పెద్ద బడ్జెట్లో సినిమా చేయడానికి ముందుకు వచ్చినట్లు చెబుతున్నారు. త్వరలోనే ఈ సినిమా గురించి ప్రకటన రావచ్చంటున్నారు. ‘అఖండ-2’ పూర్తి చేశాక ఈ సినిమా పట్టాలెక్కొచ్చు.