#baahubali2.. ఇప్పుడెందుకు ట్రెండ్ అవుతోంది?

ఈ రోజు ఉదయం నుంచి ట్విట్టర్లో దేశవ్యాప్తంగా #baahubali2 పెద్ద ఎత్తున ట్రెండ్ అవుతుండటం విశేషం. ఇప్పుడేమీ బాహుబలి-2కు వార్షికోత్సవం జరగట్లేదు. ఆ సినిమాకు సంబంధించి ఇంకే రకమైన అకేషన్ కూడా లేదు. అయినా సరే.. ఇప్పుడెందుకు ఈ హ్యాష్ ట్యాగ్ ట్రెండ్ అవుతోందని ఆశ్చర్యం కలగక మానదు. కానీ విషయం ఏంటంటే.. ‘బాహుబలి-2’ రీ రిలీజ్‌కు రెడీ అవుతోంది. కానీ అది మన దేశంలో కాదు. అమెరికాలో. అక్కడ పెద్ద స్థాయిలోనే ఈ చిత్రాన్ని రీ రిలీజ్ చేయబోతున్నారు.

యుఎస్‌లోని 16 నగరాల్లో వారం పాటు ‘బాహుబలి-2’ను ప్రదర్శించబోతున్నారు. ఇందుక్కారణం ఈ వారంలో ప్రభాస్ పుట్టిన రోజు రాబోతుండటం. ఈ నెల 23న ప్రభాస్ పుట్టిన రోజన్న సంగతి తెలిసిందే. ఈ సందర్భాన్ని పురస్కరించుకుని వారం పాటు యుఎస్‌లో ‘బాహుబలి-2’ను ప్రదర్శించడానికి సన్నాహాలు జరుగుతున్నాయి.

అసలే రీ రిలీజ్ కాన్సెప్టే లేని ఈ రోజుల్లో ఇలా ఒక భారతీయ హీరో పుట్టిన రోజును పురస్కరించుకుని యుఎస్‌లో ఈ స్థాయిలో ఒక సినిమా మళ్లీ ప్రదర్శితం కావడం విశేషమే. దీన్ని బట్టే ప్రభాస్ క్రేజ్ ఎలాంటిదన్నది అర్థం చేసుకోవచ్చు. ఇక యుఎస్‌లో నాన్-ఇండియన్స్‌కు సైతం ‘బాహుబలి’ ప్రకంపనల గురించి బాగానే తెలుసు. అక్కడ ఏకంగా 20 మిలియన్ డాలర్లకు పైగా వసూళ్లు కొల్లగొట్టిందా చిత్రం.

భారతీయ కరెన్సీలో రూ.130 కోట్ల దాకా గ్రాస్ వసూళ్లు వచ్చాయి ఆ చిత్రానికి అక్కడ. ‘బాహుబలి: ది బిగింగ్’ సైతం 7-8 మిలియన్ డాలర్ల మధ్య వసూళ్లు రాబట్టింది. ‘బాహుబలి-2’ విడుదలైనపుడు హాలీవుడ్ పెద్ద సినిమాలకు దీటుగా బాక్సాఫీస్ చార్టుట్లో అగ్ర భాగాన నిలిచిందీ చిత్రం. ఇప్పుడు కరోనా వల్ల యుఎస్‌లో సైతం హాలీవుడ్ సినిమాల సందడి పెద్దగా లేదు. ఇలాంటి సమయంలో విడుదలవుతున్న ‘బాహుబలి-2’ ఎలాంటి ప్రభావం చూపుతుందో చూడాలి.