మళ్లీ పెళ్లికొడుకు కాబోతున్న ఆమిర్?

సినిమాల పరంగా బాలీవుడ్ సూపర్ స్టార్ ఆమిర్ ఖాన్‌కు ‘మిస్టర్ పర్ఫెక్షనిస్ట్’ అని పేరుంది. కానీ వ్యక్తిగా తాను పర్ఫెక్ట్ కాదని స్వయంగా ఆమిరే ఇటీవల ఓ సందర్భంలో స్పష్టం చేశాడు. తన వైవాహిక బంధాలు నిలబడకపోవడానికి కారణం తనే అని అను చెప్పడం విశేషం. ఆమిర్‌కు ఒకటికి రెండుసార్లు వివాహం జరిగింది. కానీ రెండుసార్లూ ఆ బంధాలు నిలబడలేదు.

మొదటగా ఆమిర్ యుక్త వయసులో ఉండగా ప్రేమించి పెళ్లి చేసుకున్న రీనా దత్తాతో 16 ఏళ్లు కలిసి ఉన్నాడు. ఇద్దరికీ ఇద్దరు పిల్లలు కూడా కలిగారు. 1986లో పెళ్లి చేసుకున్న ఈ జంట 2002లో విడిపోయింది. ఆ తర్వాత కొన్ని సినిమాల కోసం తనతో కలిసి పని చేసిన కిరణ్ రావును 2005లో పెళ్లాడాడు ఆమిర్. వీరికీ సంతానం కలిగింది. ఈ జంటను చూస్తే వేవ్ లెంగ్త్ బాగా కలిసేలా కనిపించారు. ఈ బంధం ఎప్పటికీ నిలిచి ఉంటుందని అనుకుంటే.. 2021లో విడాకులు తీసుకుని షాకిచ్చారు.

ప్రస్తుతం ఆమిర్ వయసు 59 ఏళ్లకు చేరుకోవడంతో ఇక ఆమిర్ ఒంటరిగానే ఉండిపోతాడని అనుకున్నారంతా. కానీ ఈ లెజెండరీ నటుడు త్వరలోనే మళ్లీ పెళ్లికొడుకు కాబోతున్నాడంటూ బాలీవుడ్ వార్తలు మొదలయ్యాయి. అతను కొంత కాలంగా బెంగళూరుకు చెందిన ఒక మహిళతో రిలేషన్‌షిప్‌లో ఉన్నాడట. ఆమె గురించి వివరాలేవీ బయటికి రావట్లేదు. తనకు సినీ రంగంతో సంబంధం లేదని అంటున్నారు.

ఆమిర్ కొంత కాలంగా ఆమెను తరచూ కలుస్తున్నాడని.. ఇటీవలే కుటుంబ సభ్యులకు కూడా పరిచయం చేశాడని.. త్వరలోనే తమ బంధం గురించి అధికారికంగా ప్రకటించబోతున్నాడని బాలీవుడ్ మీడియాలో వార్తలు వస్తున్నాయి. మరి కొన్ని నెలల్లో వీరి పెళ్లి కూడా ఉంటుందని అంటున్నారు. 60వ పడికి చేరువ అవుతున్న ఆమిర్.. మూడో వైవాహిక బంధాన్ని ఎలా ముందుకు తీసుకెళ్తాడో చూడాలి. ఆమిర్ కాబోయే భార్య ఎవరో తెలుసుకోవాలని అభిమానులు ఆసక్తిగా ఎదురు చూస్తున్నారు.