పుష్ప-2… ఇప్పుడు కూడా తగ్గేదే లే

పుష్ప-2 విడుదలై 40 రోజులు దాటిపోయింది. రిలీజైన ఇన్ని రోజుల తర్వాత థియేటర్లలో సినిమా ఉండడమే గగనం. కానీ ఇప్పటికీ ఈ చిత్రం చెప్పుకోదగ్గ స్థాయిలో వసూళ్లు రాబడుతోంది. తెలుగు రాష్ట్రాల్లో ఈ సినిమా వసూళ్లు నామమాత్రమే కానీ.. హిందీలో మాత్రం ఇప్పటికీ మంచి వసూళ్లతో సాగిపోతోంది. కొత్త సినిమాలైన గేమ్ చేంజర్, ఫతేలకు దీటుగా ఈ సినిమా వసూళ్లు ఉంటున్నాయి.

ఇప్పటికీ రోజూ రెండు మూడు కోట్లకు తక్కువ కాకుండా కలెక్షన్లు రాబడుతోంది హిందీ వెర్షన్. శుక్రవారం నుంచి వసూళ్లు ఇంకా పెరగబోతున్న సంకేతాలు కనిపిస్తున్నాయి. దేశవ్యాప్తంగా మల్టీప్లెక్సులు ఈ శుక్రవారం టికెట్ల ధరను రూ.112కు పరిమితం చేస్తున్నాయి. ఇది అన్ని సినిమాలకూ కలిసి వచ్చే విషయమే. ముఖ్యంగా ‘పుష్న-2’ ఈ అవకాశాన్ని బాగా ఉపయోగించుకుంటున్నట్లుగా కనిపిస్తోంది.

20 నిమిషాల అదనపు నిడివితో పుష్ప-2 రీలోడెడ్ వెర్షన్ శుక్రవారమే రిలీజవుతోంది. దీంతో ఈ సినిమా పట్ల ప్రేక్షకుల్లో మళ్లీ ఆసక్తి పుడుతోంది. చూసిన వాళ్లు, చూడని వాళ్లు థియేటర్లకు వెళ్లబోతున్నారు. గత కొన్ని రోజులతో పోలిస్తే శుక్రవారం ‘పుష్ప-2’ ఎక్కువ వసూళ్లు రాబట్టేలా ఉంది. వీకెండ్లో కూడా దీని ప్రభావం బాగానే ఉండొచ్చు. తెలుగు రాష్ట్రాల్లో మరీ ప్రభావం ఉండకపోవచ్చు కానీ.. హిందీలో మాత్రం ‘పుష్ప-2’ తగ్గేదే లేదన్నట్లే దూుకెళ్తోంది.

హిందీ వెర్షన్ 8వ వారంలోనరూ కొత్త సినిమాలకు దీటుగా వసూళ్లు రాబడితే అది అద్భుతమే అవుతుంది. కాబట్టి పుష్ప-2 రన్ గురించి చాన్నాళ్ల పాటు మాట్లాడుకుంటే ఆశ్చర్యమేమీ లేదు. హిందీలో అసలు పబ్లిసిటీ అన్నదే లేకుండా ఈ సినిమా వసూళ్ల మోత మోగిస్తూ దూసుకెళ్తోంది. ‘పుష్ప-2’ వసూళ్లు ఇప్పటికే రూ.1800 కోట్ల మార్కును దాటేసి నట్లు మేకర్స్ ప్రకటించారు.