ఆ దర్శకుడు తిరిగొస్తున్నాడు

ఓనమాలు అనే మంచి సినిమాతో దర్శకుడిగా పరిచయం అయ్యాడు క్రాంతి మాధవ్. ఆయన చేసిన సినిమాలు తక్కువే కానీ.. అభిరుచి ఉన్న దర్శకుడిగా పేరు సంపాదించాడు. ‘ఓనమాలు’ మంచి సినిమాగా గుర్తింపు తెచ్చుకున్నా పెద్దగా వసూళ్లు రాలేదు. కానీ రెండో చిత్రం ‘మళ్ళీ మళ్ళీ ఇది రాని రోజు’ విమర్శకుల ప్రశంసలతో పాటు కమర్షియల్ సక్సెస్‌ను కూడా అందుకుంది. దీంతో క్రాంతి మాధవ్ మీద అంచనాలు పెరిగాయి.

కానీ క్రాంతి మాధవ్ మూడో చిత్రం ‘ఉంగరాల రాంబాబు’ ఆయనకున్న మంచి పేరును చెడగొట్టింది. అదసలు ఆయన శైలి సినిమాలాగే అనిపించలేదు. ఆపై ఆయన ‘వరల్డ్ ఫేమస్ లవర్’ తీశాడు. ఈ సినిమాలో క్రాంతి మాధవ్ అభిరుచి కనిపించింది కానీ.. ఇది కమర్షియల్‌గా పెద్ద డిజాస్టర్ కావడంతో ఈ దర్శకుడు కనుమరుగైపోయాడు. నాలుగేళ్లుగా ఆయన ఊసే లేదు టాలీవుడ్లో.

ఐతే చాలా గ్యాప్ తర్వాత క్రాంతి మాధవ్ మళ్లీ మెగా ఫోన్ పట్టాడు. ఆయన దర్శకత్వంలో ‘డీజీఎల్’ అనే సినిమా తెరకెక్కుతోంది. ఇది న్యూ ఏజ్ లవ్ స్టోరీ. నూతన సంవత్సరం సందర్భంగా ఈ సినిమా ప్రి టీజర్ వదిలారు. హీరో హీరోయిన్ల ముఖాలు చూపించకుండా వాళ్లిద్దరూ కౌగిలింతలో ఉండగా.. వాయిస్ ఓవర్ వచ్చింది.

“లవ్ వన్ సైడ్ కాదు. టూ సైడ్స్ కాదు. అన్ని దిక్కులూ దానియే. లవ్ ఈజ్ బ్లడీ 360 డిగ్రీస్” అంటూ సాగింది ఈ డైలాగ్. ప్రి టీజర్‌ను బట్టి చూస్తే సినిమా కొంచెం బోల్డ్‌గా, ట్రెండీగా ఉండబోతోందని అర్థమవుతోంది. ఈ సినిమాలో లీడ్ రోల్స్ ఎవరు చేస్తున్నారో ఇంకా వెల్లడి కాలేదు. ఆర్తి క్రియేటివ్ టీమ్ బేనర్ మీద గంటా కార్తీక్ రెడ్డి ఈ చిత్రాన్ని ప్రొడ్యూస్ చేస్తున్నాడు. సీనియర్ సినిమాటోగ్రాఫర్ జ్ఞానశేఖర్ ఛాయాగ్రహణ బాధ్యతలు నిర్వర్తిస్తున్న ఈ సినిమాకు ఫణి కళ్యాణ్ సంగీతం అందిస్తున్నాడు. తెలంగాణలోని ఖాజీపేట నేపథ్యంలో సాగే ఈ సినిమాకు వాస్తవ ఘటనలే స్ఫూర్తి అట. వేసవిలో ఈ సినిమా ప్రేక్షకుల ముందుకు రానుంది.