మళ్లీ ఇండియన్-3 షూటింగ్ అట

ఇండియాలో మోస్ట్ అవైటెడ్ సీక్వెల్స్‌లో ఒకటిగా మంచి హైప్ తెచ్చుకున్న ‘ఇండియన్-2’ సినిమాకు బాక్సాఫీస్ దగ్గర ఎంత దారుణమైన ఫలితం ఎదురైందో తెలిసిందే. శంకర్ కెరీర్లోనే ఇంత పేలవమైన సినిమా మరొకటి ఉండదు అంటే ఖండించేవాళ్లు ఉండకపోవచ్చు. అనవసరంగా ‘ఇండియన్’ సినిమాకు సీక్వెల్ చేసి చేతులు కాల్చుకున్నారనే అభిప్రాయాలు వ్యక్తమయ్యాయి. ఇండియన్-2 డిజాస్టర్ కావడంతో ఇండియన్-3 పరిస్థితి ఏంటా అనే అయోమయం నెలకొంది.

నిజానికి ఈ సీక్వెల్‌ను ఒక సినిమాగానే చేయాలనుకున్నారు. కానీ సినిమా చాలా ఆలస్యమై, బడ్జెట్ అమాంతం పెరగిపోవడంతో రెండు భాగాలుగా చేసి బిజినెస్ పరంగా కలిసొస్తుందని భావించారు. కానీ ఇందుకోసం కథను సాగదీయడమే ఈ ప్రాజెక్టుకు ప్రతికూలంగా మారింది. ఆల్రెడీ ‘ఇండియన్-3’ షూట్ కూడా పూర్తి చేసి పోస్ట్ ప్రొడక్షన్ కొంచెం పెండింగ్‌లో పెట్టిన టీం.. దాన్ని ఏం చేయబోతోందనే విషయంలో అయోమయం నెలకొంది. ఈ మధ్య ఈ చిత్రానికి థియేట్రికల్ రిలీజ్ స్కిప్ చేసి నేరుగా ఓటీటీలో రిలీజ్ చేయబోతున్నట్లు వార్తలొచ్చాయి. కానీ అదెంత వరకు నిజయో తెలియలేదు.

కట్ చేస్తే ఇప్పుడు కోలీవుడ్ నుంచి అందుతున్న సమాచారం ఏంటంటే.. ‘ఇండియన్-3’ని మళ్లీ సెట్స్ మీదికి తీసుకెళ్లబోతున్నారట. కమల్ హాసన్ చెప్పిన కొన్ని మార్పులు చేర్పులను అనుసరించి మళ్లీ కొంత షూట్ చేయాలని భావిస్తున్నారట. త్వరలోనే షూట్ ఉంటుందని వార్తలు వస్తున్నాయి. కమల్ హాసన్ ముందు నుంచి ‘ఇండియన్-3’ విషయంలో ఎగ్జైటెడ్‌గా ఉన్నారు.

‘ఇండియన్-2’ రిలీజ్ టైంలో కూడా ఇండియన్-3లోని కథే ఈ సినిమా చేయడానికి కారణమని చెప్పారు. దీంతో ‘ఇండియన్-3’నే బాగుంటుందని, ఇండియన్-2 వీక్ అనే చర్చ కూడా జరిగింది. కానీ తర్వాత కమల్ ఆ ప్రచారాన్ని ఖండించారు. కానీ చివరికి చూస్తే ఇండియన్-2 తుస్సుమనిపించింది. ఆ సినిమా చివర్లో ప్రదర్శించిన ఇండియన్-3 మాత్రం ఆసక్తికరంగా అనిపించింది. కానీ ఇండియన్-2 ఫెయిలవడంతో ఆ ప్రభావం ఇండియన్-3 మీద గట్టిగానే పడింది. కానీ కొంత మెరుగులు దిద్దితే ఇండియన్-3 ప్రేక్షకులకు బాగా నచ్చుతుందని, ఇండియన్-2 ఫెయిల్యూర్‌ను మరిపించేలా మంచి ఫలితాన్ని అందుకుంటుందని కమల్ అభిప్రాయపడడంతో టీం కన్విన్స్ అయి ఒక నెల రోజులు మళ్లీ షూట్ చేయడానికి రెడీ అవుతున్నట్లు సమాచారం.