బ్లాక్ బస్టర్ ‘క’….ప్యాన్ ఇండియా రిలీజ్ డేట్లు

ఊహించిన దానికన్నా పెద్ద స్థాయిలో సక్సెస్ అందుకున్న కిరణ్ అబ్బవరం ‘క’ ఇతర భాషల్లోకి వెళ్తోంది. అలాని రీమేక్ కాదండోయ్. దర్జాగా డబ్బింగ్ చేసుకుని ఒరిజినల్ వెర్షన్ రూపంలోనే రిలీజ్ కాబోతోంది. ముందుగా మలయాళంలో నవంబర్ 15 విడుదల కానుండగా తమిళం, హిందీలో వారం ఆలస్యంగా నవంబర్ 22 రిలీజ్ చేసేందుకు ఏర్పాట్లు చేస్తున్నట్టు సమాచారం. ‘క’ ఈవెంట్లలో కిరణ్ మాట్లాడుతూ అమరన్ తో పాటు ఇతర కోలీవుడ్ సినిమాల పోటీ వల్ల చెన్నైలో కనీసం ఒక్క షో దొరికే పరిస్థితి లేదని ఆవేదన వ్యక్తం చేయడం గుర్తే. ఇప్పుడది తీరేలా అక్కడి డిస్ట్రిబ్యూటర్ తగినన్ని స్క్రీన్లు వచ్చేలా ప్లాన్ చేస్తున్నారు.

రెండో వారంలోకి అడుగుపెట్టే ముందే ముప్పై కోట్ల గ్రాస్ దాటిన ‘క’ తీవ్రమైన పోటీని తట్టుకుని ఇంత వసూళ్లు రాబట్టడం విశేషమే. క్లైమాక్స్ నచ్చకపోతే ఇకపై సినిమాలు మానేస్తానని కిరణ్ అబ్బవరం ఛాలెంజ్ చేయడం కొద్దిరోజుల క్రితం హాట్ టాపిక్ గా మారింది. కుర్రాడు ఓవర్ కాన్ఫిడెంట్ గా ఉన్నాడని అనుకున్నారు. కట్ చేస్తే ‘క’కు చివరి ఘట్టమే ఆయువు పట్టుగా నిలిచి ప్రేక్షకులను థ్రిల్ చేసింది. పక్క రాష్ట్రాల్లో మార్కెట్ ఏర్పరుచుకోవడానికి కిరణ్ కు మంచి ఛాన్స్ దొరుకుతుంది. తమిళనాడు, కేరళతో పాటు నార్త్ లోనూ పాజిటివ్ టాక్ తెచ్చుకుంటే హక్కుల రూపంలో కొత్త మార్కెట్ ఏర్పడుతుంది.

లేట్ అయ్యిందని అనుకోవడానికి లేదు. గతంలో కాంతార ఇదే కారణాల వల్ల తెలుగులో రెండు వారాలు ఆలస్యంగా వచ్చింది. అయినా సరే బ్లాక్ బస్టర్ కు తగ్గకుండా ఫలితం దక్కించుకుంది. అలాంటి సీనే ఇప్పుడు ‘క’కు ఆశిస్తున్నారు నిర్మాతలు. సందీప్ – సుజిత్ దర్శకత్వం వహించిన ఈ విలేజ్ థ్రిల్లర్ లో నయన్ సారిక హీరోయిన్ కాగా సామ్ సిఎస్ సంగీతం సమకూర్చారు. ఆర్టిస్టుల పరంగా చేసుకున్న కూర్పు ఇప్పుడు ప్యాన్ ఇండియా పరంగా దోహదపడేలా ఉంది. ఈ వారం టాలీవుడ్ నుంచి కొత్త సినిమాలు చాలానే ఉన్నప్పటికీ ‘క’ ఇప్పుడప్పుడే విపరీతంగా నెమ్మదించదని ట్రేడ్ టాక్.